Germaniyaning Frankfurt-Mayn shahridagi O‘zbekiston Bosh konsulxonasi ko‘magida Bandlik va mehnat munosabatlari vazirligi huzuridagi Tashqi mehnat migratsiyasi agentligi (TMMA) rahbariyati hamda Germaniyaning Goldcliff Stark kompaniyasi o‘rtasida muzokaralar tashkil etildi. Bu haqda “Dunyo” agentligi xabar berdi.
Muzokaralar chog‘ida O‘zbekiston va Germaniya o‘rtasidagi mehnat migratsiyasi sohasidagi hamkorlikni yanada kengaytirish, xususan, Germaniya mehnat qonunchiligi, til o‘qitish, konsalting xizmatlari ko‘rsatish kabi yo‘nalishlarda hamkorlikning istiqbollari muhokama qilingan.
Goldcliff Stark kompaniyasi O‘zbekistondan ishchi kuchi jalb qilishdan manfaatdor ekanini va o‘zbekistonlik mutaxassislarni quyidagi yo‘nalishlarda ishga joylashtirishga tayyorligini bildirgan:
- hamshiralik ishi sohasida tegishli sertifikatlarga ega bo‘lgan o‘rta maxsus tibbiy maʼlumotli mutaxassislar;
- mehmonxonalar va restoranlar uchun xizmat ko‘rsatuvchi xodimlar (konserj, resepshin, xizmatkor, texnik, metrdotel, oshpaz, ofitsiant va qo‘riqchi);
- kafelchi, duradgor, betonchi, suvoqchi, bo‘yoqchi, elektrchi, chilangar kasblari bo‘yicha tajribali malakali quruvchilar.
Uchrashuv yakunida ikki tomonlama hamkorlik masalalarini batafsil muhokama qilish maqsadida yaqin kelajakda Goldcliff Stark kompaniyasi vakillarining O‘zbekistonga safarini tashkil etish va TMMA bilan tegishli shartnoma imzolash yuzasidan kelishuvga erishilgan.
Ma’lumot uchun, Goldcliff Stark kompaniyasi 2017-yilda Frankfurt-Mayn shahrida tashkil etilgan yuridik firma. Mazkur tashkilot qurilish, arxitektura, yo‘l va mehnat huquqi sohasida konsalting va yuridik xizmatlar ko‘rsatish bilan shug‘ullanadi.
Avvalroq Tashqi mehnat migratsiyasi agentligi hamda Shveysariyaning Globogate Concyept AG. tashkiloti o‘rtasidagi hamkorlik kelishuviga asosan tajribali tibbiyot xodimlarini Germaniya tibbiyot muassasalariga ishga jalb qilish dasturi ishlab chiqilgani to‘g‘risida xabar berilgandi.
Izoh (0)