Xitoylik Guan Yue turli kompaniyalarda 16 ta lavozimni egallab, ish beruvchilarni aldab, maosh olib yurgani aniqlandi. Bu haqda South China Morning Post nashri xabar bermoqda.
Guan Yue bir vaqtning o‘zida 16 ta kompaniyada ishchi bo‘lib, ulardan maosh olgan, lekin u hech qachon ishga bormagan va hech narsa qilmagan. Adashib qolmaslik uchun firibgar maxsus jurnal yuritib, u yerda lavozimlari bo‘yicha barcha ma’lumotlarni va hisob raqamlarini yozib yurgan.
Ayol firibgarlik sxemasini yanada kengaytirishga qaror qilganida qo‘lga olindi. 2022-yil oktabr oyida ma’lum bir IT kompaniyasi Yueni katta menejer sifatida ishga yolladi va unga yana yetti nafar yuqori maoshli mutaxassislarni yordamchi sifatida ishga olishga ruxsat berdi. Ammo Guan Yue hujjatda yordamchilar ishga qabul qilindi deb ko‘rsatib, aslida hech kimni ishga olmay, ularning o‘rniga ham maosh olib yurgan. Va’da qilingan natijalar amalga oshmaganidan keyin kompaniya barcha xodimlar bilan shartnomalarni bekor qildi.
Kompaniya egasi ishdan bo‘shatilgan xodimlarning hujjatlarini ko‘zdan kechirar ekan, firibgarlik qurboni bo‘lganini sezib qoldi va politsiyaga bu haqida xabar berdi. Yue hibsga olingan paytda uning hisob raqamlarida boshqa xodimlarning ish haqi sifatida ko‘rsatilgan pul tushumlari topildi.
Tergovchilar Yue 53 kishidan iborat jinoiy guruhda faoliyat yuritganini aniqladilar. Uch yil davomida firibgarlarning daromadi taxminan 50 million yuanni (taxminan 6 mln dollardan ortiq) tashkil etgan. O‘g‘irlangan pulga ayol va uning eri Shanxayning nufuzli hududidan hashamatli villa sotib olishgan. Endi Yue va uning jinoiy sheriklarini qamoq jazosi kutmoqda.
Izoh (0)