Surxondaryo viloyatida paxta rejasini birinchilardan bo‘lib bajargan fermerga avtomobil sovg‘a qilindi. Bu haqda hokimlik axborot xizmati xabar tarqatdi.
Ma’lum qilinishicha, Oltinsoy tumanining “Paxtakor” hududidagi “Botosh lochini” fermer xo‘jaligi 44,8 gektar paxta maydonidan 187,4 tonna hosil olib, 3-sentabr kuni shartnomaviy rejani 100 foizga bajargan. Fermerning o‘rtacha hosildorligi 44 sentnerni tashkil etgan bo‘lib, hozirda uning dalasida birinchi terim ishlari davom etmoqda.
Bugun shartnomaviy rejani birinchilardan bo‘lib bajargan fermer xo‘jaligi rahbariga “Denov tekstil klaster” MCHJ tomonidan Cobalt avtomobili topshirildi. Avtomashina kaliti hamda 1,5 tonnalab paxta tergan ilg‘or terimchilar, qator fermer xo‘jaliklar rahbarlari, mexanizatorlar, suvchi va ishchilarga maishiy texnikalar, sovg‘alar viloyat hokimi tomonidan tantanali ravishda topshirildi, — deyiladi hokimlik axborotida.
Qo‘shimcha qilinishicha, viloyat hokimi shu kuni tumandagi “Feruz”, “Shirin EJYu” fermer xo‘jaliklari dalalarida paxta terimi jarayonlari hamda g‘alladan bo‘shagan maydonlarga ekilgan takroriy ekinlar parvarishi bilan tanishgan.
Izoh (0)