Сурхондарёда пахта режасини бажарган фермерга Cobalt автомобили совға қилинди

Сурхондарё вилоятида пахта режасини биринчилардан бўлиб бажарган фермерга автомобиль совға қилинди. Бу ҳақда ҳокимлик ахборот хизмати хабар тарқатди. 

Маълум қилинишича, Олтинсой туманининг “Пахтакор” ҳудудидаги “Ботош лочини” фермер хўжалиги 44,8 гектар пахта майдонидан 187,4 тонна ҳосил олиб, 3 сентябрь куни шартномавий режани 100 фоизга бажарган. Фермернинг ўртача ҳосилдорлиги 44 центнерни ташкил этган бўлиб, ҳозирда унинг даласида биринчи терим ишлари давом этмоқда.

Бугун шартномавий режани биринчилардан бўлиб бажарган фермер хўжалиги раҳбарига “Денов текстиль кластер” МЧЖ томонидан Cobalt автомобили топширилди. Автомашина калити ҳамда 1,5 тонналаб пахта терган илғор теримчилар, қатор фермер хўжаликлар раҳбарлари, механизаторлар, сувчи ва ишчиларга маиший техникалар, совғалар вилоят ҳокими томонидан тантанали равишда топширилди, — дейилади ҳокимлик ахборотида.

Қўшимча қилинишича, вилоят ҳокими шу куни тумандаги “Феруз”, “Ширин ЭЖЮ” фермер хўжаликлари далаларида пахта терими жараёнлари ҳамда ғалладан бўшаган майдонларга экилган такрорий экинлар парвариши билан танишган.