Rossiyalik harbiy uchuvchi Maksim Kuzminov Mi-8 vertolyotida Ukrainaga uchib o‘tib, aviatexnikani Ukraina razvedkasiga topshirib, urushga qarshiligini aytdi. Bu haqda “Agenstvo” nashri xabar berdi.
Ukraina razvedkasi Mi-8 vertolyotini avgust oyida Ukrainaga topshirgan rossiyalik uchuvchi haqida hujjatli film e’lon qildi. Videoda uchuvchi ham ko‘rinish berib, rus tilida gapiradi:
“Hech kim bu urushni xohlamaydi. Ukraina g‘alaba qozonganida ko‘rasiz. Bu faqat vaqt masalasidir”, — degan u.
Kuzminov ekipajning boshqa a’zolarini ham taslim bo‘lishga chaqirgan.
“Yonimda ikkita ekipaj a’zosi bor edi. Bizda hech qanday qurol yo‘q edi. Uchuvchilarimiz qurolsiz parvoz qiladi. Yigitlarni tinchlantirdim, hammasi yaxshi, bu yerda yaxshi odamlar yashaydi, hammasi yaxshi bo‘ladi, dedim. Ammo ular qo‘rqib, o‘zlarini biroz agressiv tuta boshladi va vertolyotdan qochib, chegara tomon yugurishdi. Ularning keyingi taqdiri menga noma’lum, ammo ommaviy axborot vositalarida aytilishicha, ular yo‘q qilingan bo‘lishi mumkin”, — dedi Kuzminov.
Uchuvchi tegishli operatsiya qanday o‘tgani haqida bo‘lishdi. U “vertolyotni nafaqat olib qochgan, balki uni A nuqtadan B nuqtasiga rasman olib o‘tgan”, chunki marshrut va qo‘nish joyi oldindan kelishilgan.
“Men Ukraina razvedkasi vakillari bilan bog‘landim, vaziyatimni tushuntirdim, menga shunday variant taklif qilindi: Keling, biz sizning xavfsizligingizga kafolat beramiz, yangi hujjatlar, pul kompensatsiyasi, mukofotni kafolatlaymiz. Biz bu tafsilotlarni muhokama qildik va to‘g‘ridan-to‘g‘ri parvozimni rejalashtira boshladim...
Men chegara yaqinida ekanimni angladim, joylashuvimni taqdim etdim. Keling, harakat qilaylik, uzoqda emasman, dedim. Nihoyat qaror qabul qilib, radio sukunat rejimida juda past balandlikda uchdim. Menga nima bo‘lganini hech kim bilmas edi. Muvaffaqiyatli qo‘ndim, ular men bilan uchrashishdi, gaplashishdi va nima bo‘layotganini tushuntirishdi”, — dedi Maksim.
Operatsiyaning yakuniy bosqichida uchuvchi jarohat olgan, biroq unga vaqtida tibbiy yordam ko‘rsatilgan. U qonunda nazarda tutilgan barcha xavfsizlik kafolatlarini olgan. Kuzminov boshqa uchuvchilarni ham Ukrainaga qochib ketishga chaqirgan.
“Agar siz men qilgan ishni qilsangiz, qilmishingizdan afsuslanmaysiz. Butun umringiz davomida mutlaqo hamma narsa bilan ta’minlanasiz”, — dedi u.
Kuzminov “Rossiya armiyasi aviatsiyasi, aloqa tizimlari va aerodrom tarmog‘i haqida juda qimmatli dalillarni” taqdim etadi. U o‘zi bilan birga qimmatli hujjatlar va maxfiy texnik jihozlarni Ukrainaga olib kelgan.
Uchuvchining ta’kidlashicha, u urush paytida jangovar harakatlarda bevosita ishtirok etmagan, faqat harbiy yoki yuk tashish uchun transport operatsiyalarini amalga oshirgan. Endilikda u Ukraina harbiy-havo kuchlariga qo‘shilish imkoniyatini ko‘rib chiqmoqda.
“Maksim endi ozod mamlakatda erkin odam. Unda Ukrainaning xavfsizlik va mudofaa sektoriga qo‘shilib, urushda Rossiyaning harbiy agressiyasiga qarshi turish niyati bor”, — dedi Mudofaa vazirligi razvedkasi rasmiysi Andrey Yusov.
“Kelajakda hayotimni aviatsiya bilan bog‘lamoqchiman. Menga shu yerda qolish taklif qilindi, ko‘rib chiqaman”, — dedi rossiyalik uchuvchi.
Ukraina uchuvchi va uning oilasiga xavfsizlik, to‘lovlar hamda yangi hujjatlarni va’da qilgan. Maksim Ukraina fuqaroligini olmoqchi.
Izoh (0)