Ukrainadagi urushga yollangan “Vagner” sobiq qo‘mondoni Andrey Medvedev 12-yanvar kuni Rossiya hududini tark etib, Norvegiya chegarasini noqonuniy kesib o‘tdi. Bu haqda 15-yanvar kuni huquq himoyachilarining “Gulagu.net” portalida xabar berildi.
Medvedev Rossiyadan Murmansk viloyatidagi Nikel aholi punkti orqali chiqib ketgan va Norvegiyaga borgach, huquq-tartibot xodimlaridan himoya va siyosiy boshpana so‘ragan. Shundan so‘ng qochoq mahalliy aeroportdan qo‘riqlash hamrohligida Osloga olib ketilgan va u yerda migratsiya qonunchiligini buzuvchilar markaziga joylashtirilgan.
Andrey Medvedev Rossiya–Norvegiya chegarasini qanday kesib o‘tdi?
Medvedevga ko‘ra, u oq kamuflyaj xalatida qochib ketgan. Rossiya chegarachilari uni Norvegiya chegarasiga 2 kilometr qolganda aniqlab, unga qarata o‘t ochgan va xizmat itini uning orqasidan qo‘yib yuborgan.
“Men muzlagan ko‘lga tomon yugurdim, ular orqamdan yugurishdan qo‘rqdi, chunki muz juda yupqa edi. Orqamdan itni qo‘yib yuborishdi, lekin u simga o‘ralashib qoldi. Men Norvegiyadagi eng yaqin aholi punktigacha yugurdim”, — deydi Medvedev.
Norvegiyaga yetib kelgach, Medvedev duch kelgan birinchi uyni taqillatgan. U eshikni ochgan uy egasiga ingliz tilida yordamga muhtojligini tushuntirgan.
“U rozi bo‘ldi va eshikni yopdi. Keyin yo‘l bo‘ylab yurib, qishloqdan 3 kilometr uzoqlashdim. Norvegiya chegarachilari va politsiyachilar meni ushlab oldi”, — deya davom etdi Medvedev.
Keyin u samolyotda Oslodagi migratsiya markaziga yuborilgan. Hozirda u yerda siyosiy boshpana berish to‘g‘risidagi qarorni kutmoqda.
Andrey Medvedev haqida nimalar ma’lum?
“Gulagu.net” portalining xabar berishicha, Medvedev “Vagner” guruhi bilan 2022-yilning 6-iyulida 4 oylik shartnoma imzolagan. U yerda 7-shturm otryadining 4-vzvod 1-bo‘limi qo‘mondoni bo‘lib xizmat qilgan. 2022-yil dekabr oyida Andrey Medvedev va uning o‘rtog‘i “Gulagu.net” tahririyatiga murojaat qilib, suddan tashqari qatag‘on va “Vagnerchilar”ning o‘ldirilishidan qochish uchun yordam so‘ragan.
Medvedev xizmat davomida ukrainaliklarga qarshi jang qilishdan bosh tortgan yoki xususiy harbiy kompaniya safini tark etmoqchi bo‘lganlarga qarshi “Vagner” asoschisi Yevgeniy Prigojinning xavfsizlik xizmati qatlni amalga oshirganini aytdi.
Mavzuga doir:
Izoh (0)