Россиялик ҳарбий учувчи Максим Кузминов Ми-8 вертолётида Украинага учиб ўтиб, авиатехникани Украина разведкасига топшириб, урушга қаршилигини айтди. Бу ҳақда “Агенство” нашри хабар берди.
Украина разведкаси Ми-8 вертолётини август ойида Украинага топширган россиялик учувчи ҳақида ҳужжатли фильм эълон қилди. Видеода учувчи ҳам кўриниш бериб, рус тилида гапиради:
“Ҳеч ким бу урушни хоҳламайди. Украина ғалаба қозонганида кўрасиз. Бу фақат вақт масаласидир”, — деган у.
Кузминов экипажнинг бошқа аъзоларини ҳам таслим бўлишга чақирган.
“Ёнимда иккита экипаж аъзоси бор эди. Бизда ҳеч қандай қурол йўқ эди. Учувчиларимиз қуролсиз парвоз қилади. Йигитларни тинчлантирдим, ҳаммаси яхши, бу ерда яхши одамлар яшайди, ҳаммаси яхши бўлади, дедим. Аммо улар қўрқиб, ўзларини бир оз агрессив тута бошлади ва вертолётдан қочиб, чегара томон югуришди. Уларнинг кейинги тақдири менга номаълум, аммо оммавий ахборот воситаларида айтилишича, улар йўқ қилинган бўлиши мумкин”, — деди Кузминов.
Учувчи тегишли операция қандай ўтгани ҳақида бўлишди. У “вертолётни нафақат олиб қочган, балки уни А нуқтадан Б нуқтасига расман олиб ўтган”, чунки маршрут ва қўниш жойи олдиндан келишилган.
“Мен Украина разведкаси вакиллари билан боғландим, вазиятимни тушунтирдим, менга шундай вариант таклиф қилинди: Келинг, биз сизнинг хавфсизлигингизга кафолат берамиз, янги ҳужжатлар, пул компенсацияси, мукофотни кафолатлаймиз. Биз бу тафсилотларни муҳокама қилдик ва тўғридан-тўғри парвозимни режалаштира бошладим...
Мен чегара яқинида эканимни англадим, жойлашувимни тақдим этдим. Келинг, ҳаракат қилайлик, узоқда эмасман, дедим. Ниҳоят қарор қабул қилиб, радио сукунат режимида жуда паст баландликда учдим. Менга нима бўлганини ҳеч ким билмас эди. Муваффақиятли қўндим, улар мен билан учрашишди, гаплашишди ва нима бўлаётганини тушунтиришди”, — деди Максим.
Операциянинг якуний босқичида учувчи жароҳат олган, бироқ унга вақтида тиббий ёрдам кўрсатилган. У қонунда назарда тутилган барча хавфсизлик кафолатларини олган. Кузминов бошқа учувчиларни ҳам Украинага қочиб кетишга чақирган.
“Агар сиз мен қилган ишни қилсангиз, қилмишингиздан афсусланмайсиз. Бутун умрингиз давомида мутлақо ҳамма нарса билан таъминланасиз”, — деди у.
Кузминов “Россия армияси авиацияси, алоқа тизимлари ва аэродром тармоғи ҳақида жуда қимматли далилларни” тақдим этади. У ўзи билан бирга қимматли ҳужжатлар ва махфий техник жиҳозларни Украинага олиб келган.
Учувчининг таъкидлашича, у уруш пайтида жанговар ҳаракатларда бевосита иштирок этмаган, фақат ҳарбий ёки юк ташиш учун транспорт операцияларини амалга оширган. Эндиликда у Украина ҳарбий-ҳаво кучларига қўшилиш имкониятини кўриб чиқмоқда.
“Максим энди озод мамлакатда эркин одам. Унда Украинанинг хавфсизлик ва мудофаа секторига қўшилиб, урушда Россиянинг ҳарбий агрессиясига қарши туриш нияти бор”, — деди Мудофаа вазирлиги разведкаси расмийси Андрей Юсов.
“Келажакда ҳаётимни авиация билан боғламоқчиман. Менга шу ерда қолиш таклиф қилинди, кўриб чиқаман”, — деди россиялик учувчи.
Украина учувчи ва унинг оиласига хавфсизлик, тўловлар ҳамда янги ҳужжатларни ваъда қилган. Максим Украина фуқаролигини олмоқчи.
Изоҳ (0)