Qashqadaryo viloyatida faoliyat yurituvchi tadbirkor Nurbek Ergashev chekka hudud aholisi farzandlari uchun homiylik asosida maktab qurib berdi. Bu haqda “Daryo”ga viloyat hokimligi axborot xizmati xabar berdi.
Ta’kidlanishicha, bugun ushbu maktab ochilishiga bag‘ishlangan tadbir bo‘lib o‘tgan.
Maktab binosi “Sulton tex” korxonasi homiyligida qayta ta’mirlanib, zamonaviy ko‘rinishga keltirildi. Shuningdek, sinfxonalar jihozlanib 44-sonli yangi maktab deb e’tirof etildi, — deydi hokimlik axborot xizmati rahbari Ahror Sodiqov.
Hokimlik axborot xizmati rahbariga ko‘ra, maktabning ochilish marosimida viloyat hokimi Murodjon Azimov boshchiligidagi sektor rahbarlari, oqsoqollar va qishloq ahli ishtirok etgan.
Tadbirkor homiyligida ushbu maktab o‘quvchilari uchun mini stadion qurish ishlari davom etmoqda.
Prezidentimiz tomonidan olib borilayotgan iqtisodiy islohotlar biz tadbirkorlarning daromadimiz ko‘payib, shunday homiyliklar qilishimizga zamin yaratmoqda. Tadbirkor sifatida bundan keyin ham ijtimoiy sohani qo‘llab-quvvatlab, tuman, viloyat va respublika miqyosida yirik loyihalarni amalga oshirishda davom etamiz, — deydi tadbirkor.
Foto: Qashqadaryo viloyati hokimligi
Tadbirkor mazkur maktab uchun qancha mablag‘ sarflaganini ochiqlashni istamadi.
Ilm-fan har doim qo‘llab-quvvatlashga bog‘liq bo‘lgan. Qayerda ilmga e’tibor kuchli bo‘lsa, o‘sha yerda rivojlanish bo‘lgan. Buyuk siyosatchilardan biri Benjamin Franklin “Eng yaxshi investitsiya — bilim olish uchun kiritilgan investitsiyadir”, degan edi. Shuning uchun barchamiz imkoniyatlarimizni ko‘proq farzandlarimiz ilmli bo‘lishi uchun sarflashimiz lozim deb hisoblayman, — deydi tadbirda so‘z olgan tadbirkor Nurbek Ergashev.
Ahror Sodiqovning qo‘shimcha qilishicha, ushbu maktab qurilishidan minnatdor bo‘lgan aholi tadbirkorga zarbof to‘n kiydirib, minnatdorlik izhor qilgan.
Izoh (0)