Tojikiston prezidenti Emomali Rahmon Markaziy Osiyo davlatlari rahbarlari uchrashuviga Turkmaniston Xalq Maslahati raisi Gurbanguli Berdimuhamedovni taklif qildi. Tojikistonlik siyosatchining tegishli maktubi TDH davlat axborot agentligi tomonidan e’lon qilindi.
Rahmon o‘z murojaatida Ashxobodda avgust boshida Turkmaniston, O‘zbekiston va Tojikiston prezidentlarining uch tomonlama sammitiga mezbonlik qilgani uchun Gurbanguli Berdimuhamedovga minnatdorlik bildirgan.
Shuningdek, Tojikiston prezidenti Xalq Maslahati raisini 14-sentabr kuni Dushanbe shahrida bo‘lib o‘tadigan Markaziy Osiyo davlatlari rahbarlarining beshinchi maslahat uchrashuviga taklif qilgan.
Eslatib o‘tamiz, Gurbanguli Berdimuhamedov bir yarim yildan buyon davlat rahbari sifatida faoliyat olib bormaydi, 2022-yil martida uning o‘rniga o‘g‘li Serdar Berdimuhamedov prezident etib saylangan.
“Gurbanguli Berdimuhamedov de-fakto eng muhim siyosiy va iqtisodiy masalalar bilan shug‘ullanishda davom etayotganiga qaramay, bunday uchrashuvda ishtirok etishi kerak bo'lgan mamlakatning de-yure prezidenti uning o‘g‘lidir. Serdar ham taklif olganmi yoki yo‘qmi noma’lum, Turkmaniston matbuoti faqat otasiga taklifnoma yuborilganini e’lon qilgan”, — deydi “Xronika Turkmenistana” nashri.
Izoh (0)