АҚШ президенти Жо Байден Хитой раҳбари Си Цзиньпиннинг шу ой Нью-Деҳлида бўлиб ўтадиган G20 саммитида иштирок этмаслигидан ҳафсаласи пир бўлганини айтди. Бу ҳақда Reuters хабар бермоқда.
“Ҳафсалам пир бўлди, лекин у (Хитой раҳбари) билан кўришиш ниятим бор”, — деди Байден, эҳтимолий учрашув тафсилотларига аниқлик киритмасдан.
Ўтган ҳафта Хитой Ташқи ишлар вазирлиги Си Цзиньпиннинг G20 саммитига сафари режалари билан боғлиқ вазият ҳали номаълум эканини хабар қилганди. Reuters агентлигига кўра, Пекин саммитга Си ўрнига бош вазир Ли Сянни юборади. Агентлик билан гаплашган таҳлилчилар Хитойнинг бу қарорига Ҳиндистон билан рақобат сабаб бўлиши мумкин, деб ҳисобламоқда.
Оқ уй Миллий хавфсизлик кенгашининг стратегик алоқалар бўйича координатори Жон Кирби сентябрь ойи бошида Байден Си Цзиньпинни Нью-Деҳлида кўришни истаётганини айтди.
Financial Times газетасининг ёзишича, агар Хитой раҳбари ҳақиқатан ҳам илк бор G20 саммитида иштирок этишдан бош торца, бу форумнинг жаҳон етакчилари муҳокамаси учун глобал платформа сифатидаги мавқейига путур етказади ва Ҳиндистон позициясига зарба бўлади.
Маълумот учун Ҳиндистон G20 га 2022 йил 1 декабрдан бери раислик қилмоқда. Ташкилот саммити 9—10 сентябрь кунлари Нью-Деҳлида бўлиб ўтади. Унга G20 аъзолигига кирувчи барча мамлакатлар ва яна тўққизта давлат (Бангладеш, Миср, Испания, Маврикий, Нигерия, Нидерландия, Бирлашган Араб Амирликлари, Уммон ва Сингапур) раҳбарлари таклиф этилган. Аввал Кремль матбуот хизмати Россия президенти Владимир Путин Ҳиндистонда бўлиб ўтадиган G20 саммитида қатнашмаслигини маълум қилганди. Россия делегациясига ташқи ишлар вазири Сергей Лавров бошчилик қилади.
Изоҳ (0)