O‘zbekistonda kreditlar foizi ko‘tarilgani maʼlum bo‘ldi

Banklarda o‘tgan oydagi kredit stavkalari 23 foizgacha o‘sdi. Omonatlar esa 21,2 foizga yetgan.

Iyul oyida milliy valyutadagi kreditlarning o‘rtacha tortilgan foiz stavkalari 23 foizga yetgan. Bu haqda Markaziy bank xabar qildi. Bunda korporativ kreditlarning stavkasi 22,5 foiz, chakana kreditlar stavkasi 23,2 foiz bo‘lgan.

Kreditlar narxining ko‘tarilishi omonatlar stavkalarining doimiy o‘sishi fonida yuz bermoqda. Iyul yakunlariga ko‘ra, omonatlarning o‘rtacha stavkasi 21,2 foizga yetgan. Bu 2014-yildan buyon qayd etilgan eng yuqori ko‘rsatkich hisoblanadi.

Markaziy bank xabariga ko‘ra, 2022-yil yakunlari bo‘yicha kreditlar stavkalari 22,3 foiz bo‘lgan. 2021-yilda 20,8 foiz, 2020-yilda 18,8 foizni tashkil etgan.

Omonatlar esa 2020-yilda 17 foiz, 2021-yilda 20,2 foiz, 2022-yilda ham 20,2 foiz bo‘lgan.

• O‘zbekistonda milliy valyutadagi kreditlar bo‘yicha o‘rtacha foiz stavkalari so‘nggi bir necha choraklarda yillik 22-23 foiz atrofida muvozanatlashgani xabar qilingandi.
• Iyun oyida milliy valyutadagi qisqa muddatli kreditlar bo‘yicha o‘rtacha tortilgan foiz stavkalari 22,3 foizni va uzoq muddatli kreditlar bo‘yicha 22,7 foizni tashkil etgan.