Shimoliy Koreyaning josus sun’iy yo‘ldoshini orbitaga chiqarishga ikkinchi urinishi muvaffaqiyatsiz yakunlandi. Raketa-tashuvchining uchinchi pog‘onasida nosozlik yuz berdi, deb yozmoqda The Guardian.
Kosmik apparatni uchirishga navbatdagi urinish oktabr oyiga rejalashtirilgan.
May oyida parvozga birinchi urinish muvaffaqiyatsiz tugagandi. O‘shanda “Chollima-1” raketasi dengizga qulab tushgan.
Bu safar raketaning birinchi va ikkinchi pog‘onalari parvozi yaxshi o‘tgan, biroq uchinchi bosqich parvozi vaqtida favqulodda portlash tizimidagi xatolik tufayli missiya yakunlanmagan.
Janubiy Koreya harbiylari Soxe kosmodromidan uchirilgan raketaning parvozini kuzatib turgan va u muvaffaqiyatsizlikka uchradi, degan xulosaga kelgan.
Yaponiyada trevoga e’lon qilindi
KXDR sun’iy yo‘ldoshi sabab Yaponiyada tongda favqulodda ogohlantirish e’lon qilindi, unda Okinavaning eng janubiy prefekturasi aholisiga yopiq joylardan boshpana topish tavsiya qilindi.
Trevoga e’lon qilinganidan taxminan 20 daqiqa o‘tgach, Yaponiya hukumati raketa Tinch okeaniga o‘tib ketganini ma’lum qildi va trevoga to‘xtatildi.
Janubiy Koreya KXDR harakatlarini qoraladi
Janubiy Koreya harbiylari sun’iy yo‘ldoshni uchirishga urinishni provokatsiya va BMT Xavfsizlik Kengashining Shimoliy Koreyaga ballistik raketa texnologiyasidan foydalanishni taqiqlovchi rezolyutsiyalarini buzish sifatida qoraladi.
Anonimlik sharti bilan gapirgan amerikalik mulozim AQSH harbiylari Shimoliy Koreyaning sinovidan xabardor ekanini tasdiqladi, biroq tafsilotlarni berishdan bosh tortdi.
Shimoliy Koreya Milliy aerokosmik ma’muriyati muvaffaqiyatsizlik sababini tekshirish va tuzatish choralarini ko‘rishini ma’lum qildi.
Yadro quroliga ega KXDR orbitaga o‘zining birinchi harbiy josuslik sun’iy yo‘ldoshini joylashtirmoqchi. Kelajakda Pxenyan Amerika va Janubiy Koreya qo‘shinlarining harakatini kuzatish uchun butun sun’iy yo‘ldoshlar flotini yaratishni rejalashtirmoqda.
Izoh (0)