Фарғона вилоятида 45 та истеъмолчи электр энергияси ва табиий газдан ноқонуний фойдаланиб келгани аниқланди, деб хабар беради Энергетика вазирлиги матбуот хизмати.
Маълум қилинишича, “Ўзэнергоинспекция” ва ҳуқуқни муҳофаза қилувчи органлар билан ҳамкорликда сўнгги ўн кунда Фарғона вилоятида ўтказилган назорат тадбирларида 45 та ҳолатда истеъмолчилар томонидан табиий газ ва электр энергиясидан ноқонуний фойдаланиш ҳолатлари аниқланган.
Бунинг натижасида 599 миллион 300 минг метр куб табиий газ ва 1 миллион 236 минг кВт/соат электр энергияси талон-торож қилинган бўлиб, тизимга етказилган 1 миллиард 722 миллион сўм зарар ундиришга қаратилган.
Маълумот учун, ушбу ҳажмдаги табиий газ қарийб 3 мингта, электр энергияси эса 6 мингта хонадоннинг бир ойлик истеъмолига тенгдир.
Қоидабузар истеъмолчиларга нисбатан белгиланган тартибда чоралар кўрилиб, тегишли ҳужжатлар ҳуқуқни муҳофаза этувчи органларга тақдим қилинган.
Ўзбекистонда 2023 йилнинг 6 ойида электр энергиясидан ноқонуний фойдаланиш туфайли 78,5 миллиард сўм, табиий газдан ноқонуний фойдаланиш сабабли эса 231 миллиард 866 миллион сўм зарар кўрилган. Бундан олдин Бухоро шаҳрида фаолият юритиб келаётган корхона электр ҳисоблагичга ташқи таъсир кўрсатиши натижасида тизимга 2 миллиард сўмлик зарар етказилгани тўғрисида хабар берилганди.
Изоҳ (0)