O‘zbekistonning har bir hududida 1,5 ming o‘rinli ko‘p tarmoqli shifoxonalar quriladi

O‘zbekiston tibbiyotida xususiy sektor imkoniyatlaridan unumli foydalanish choralari ko‘rilmoqda. Bu haqda O‘zA xabar berdi.

Toshkent shahrining barcha tumanlari va Surxondaryo viloyatining Termiz shahri, Sherobod, Angor, Qumqo‘rg‘on va Boysun tumanlarida tibbiy laboratoriya xizmatlari autsorsing asosida tashkil etildi.

Ushbu tajribani 170 ta tuman va shahar tibbiyot birlashmalarida ham ommalashtirish bo‘yicha 10 dan ortiq xorijiy tadbirkorlar bilan muloqot olib borilmoqda.

Tadbirkorlarga viloyat va tuman shifoxonalarida ehtiyoj yuqori bo‘lgan MRT va MSKT kabi zamonaviy tibbiy uskunalarni muassasaning o‘ziga o‘rnatib, shu yerda xizmat ko‘rsatish taklif etiladi.

Onkologiya markazi va uning hududiy filiallarida bemorlarga tezkor hamda aniq tashxis qo‘yish va davolash uchun zamonaviy asbob-uskunalarga ehtiyoj yuqori. Ushbu yo‘nalishda ham xususiy sektorga ijara shartnomasi asosida “rentgen-radiologiya markazlari”ni tashkil etish bo‘yicha takliflar tayyorlangan.

Nashr xabariga ko‘ra, bunday markazlar tashkil etilsa, ularning xizmatlari kafolatlangan xizmatlar doirasida davlat tomonidan sotib olinadi. Bundan tashqari, har bir hududda davlat-xususiy sheriklik asosida 1000-1500 o‘rinli ko‘p tarmoqli shifoxonalarni barpo etish bo‘yicha loyihalar ishlab chiqilmoqda.