Самарқанд шаҳрида жойлашган Silk Road by Minyoun меҳмонхонасида Ўзбекистон—Туркия тиббиёт форумининг иккинчи куни бошланди. ССВ матбуот хизматининг маълум қилишича, тадбирни Ўзбекистон Соғлиқни сақлаш вазири Амрилло Иноятов кириш сўзи билан очиб берган.
Қайд этилишича, бугунги кунда Ўзбекистонда жами 8,3 мингта нодавлат тиббиёт ташкилоти фаолият юритмоқда. Шундан 1618 таси стационар муассаса бўлиб, уларда 45 мингдан ортиқ шифо ўрни яратилган.
Қолаверса, хусусий секторда 17 минг нафардан ортиқ шифокор, 26 мингдан ортиқ ўрта тиббиёт ходимлари меҳнат қилмоқда. Республика бўйича 20 дан ортиқ хорижий инвестицияси иштирокидаги 159 та хусусий шифохона фаолият юритяпти.
Тошкент шаҳрида хусусий шифохоналар 1,7 мингтадан ортган бўлса, уларнинг сони Андижонда 750 тадан, Самарқанд, Қашқадарё ва Тошкент вилоятларида эса 650 дан ошган.
Ҳозир хусусий тиббиёт муассасалари 200 тадан ортиқ ихтисосликлар бўйича 2250 дан зиёд тиббий хизмат турларини кўрсатиб келмоқда. Натижада мамлакатда хусусий секторнинг умумий соғлиқни сақлашдаги улуши 30 фоизга етди. Хусусий тиббиёт ташкилотларининг сони ҳар йили ўртача 600-700 тага ортиб бориши кузатилмоқда.
Май ойида ҳар бир ҳудудда давлат-хусусий шериклик асосида 1000-1500 ўринли кўп тармоқли шифохоналарни барпо этиш бўйича лойиҳалар ишлаб чиқилаётгани тўғрисида хабар берилганди. Шунингдек, келгуси етти йилда туман ва шаҳарларда 700 та янги поликлиника ташкил этилиши айтилган эди.
Изоҳ (0)