Eyfel minorasiga bomba qo‘yilgani haqidagi xabar tufayli sayyohlar evakuatsiya qilindi

Bugun, 12-avgust kuni bomba tahdidi tufayli Eyfel minorasining uch qavatidagi sayyohlar evakuatsiya qilindi. 

BFMTV telekanali xabariga ko‘ra, voqea joyida politsiya va sapyorlar ishlamoqda. Eyfel minorasini ekspluatatsiya qilish jamiyati (SETE) jurnalistlarga ma’lum qilishicha, “vaziyat kam uchraydigan bo‘lsa-da, ko‘rilayotgan choralar odatiy holdir”: har qanday tahdid tug‘ilishi bilan tashrif buyuruvchilar voqea joyidan evakuatsiya qilinadi.

“Politsiya o‘z joyida, sapyorlar joyida”, deb SETE vakili so‘zlaridan iqtibos keltiradi Le Figaro. 

Kunning ikkinchi yarmida boshlangan evakuatsiya minoraning uch qavatini, jumladan, restoran, shuningdek, birinchi qavatdagi maydonni ham qamrab olgan. Mahalliy vaqt bilan soat 14:00 ga qadar barcha tashrif buyuruvchilar xavfli hududdan evakuatsiya qilindi.