Issiqko‘ldagi suv 10 yil ichida sohildan qariyb bir metrga chekingan, deb ma’lum qildi Qirg‘iziston Tabiiy resurslar, ekologiya va texnik nazorat vazirligining Suv va yer resurslari boshqarmasi boshlig‘i Taalay Dalbayev.
“2011-yildan 2021-yilgacha qirg‘oqdan suv 95 santimetr ortga chekindi. Bunga issiq iqlim tufayli ko‘lga quyiladigan kichik daryolar sonining kamaygani sabab bo‘ldi. Butun Qirg‘izistonda qurib qolgan kichik daryolarni uchratish mumkin. Bu yil yozda deyarli yomg‘ir yog‘madi. Issiqko‘l viloyatida 156 ta daryo bor, ammo ko‘lga atigi 30 tasi quyiladi”, — dedi qirg‘izistonlik rasmiy.
U muammoni bartaraf etish usullarini ham ma’lum qildi. Qayd etilishicha, buning uchun suvni tejovchi texnologiyalarni joriy etish, suvni kam sarflaydigan ekinlarni ekish, tomchilatib sug‘orishga o‘tish zarur.
Eslatib o‘tamiz, Qirg‘iziston Issiqko‘l bo‘yida yangi shahar qurishni boshlagan. Osmon nomli “kelajak shahri”ni yetti-o‘n yil ichida qurish rejalashtirilgan; unda 500-700 ming kishi yashashi mumkin bo‘ladi.
Izoh (0)