Indoneziyada Qozog‘istonning ikki fuqarosi giyohvand moddalar bilan bog‘liq jinoyatda ayblanib, hibsga olindi. Bu haqda Qozog‘iston Tashqi ishlar vazirligiga tayanib Tengrinews xabar berdi.
Hozirda Indoneziya huquqni muhofaza qiluvchi organlari tomonidan dastlabki surishtiruv ishlari olib borilmoqda. Boshqa tafsilotlar oshkor qilinmayapti.
Qozog‘istonning Jakartadagi elchixonasi tergov organlari va ayblanuvchilarning yaqinlari bilan aloqada bo‘lib turibdi. Masala qozog‘istonlik diplomatlar nazorati ostida, deyiladi TIV xabarida.
Qozog‘iston fuqarolari 2025-yil aprelida qo‘lga olingan. Ulardan 49 grammga yaqin kristall metamfetamin topilgan. Ular giyohvand moddalarni tarqatishda ayblanmoqda va o‘lim jazosiga hukm qilinishi mumkin.
Indoneziya qonunchiligiga ko‘ra, giyohvand moddalarni saqlash yoki sotish og‘ir jinoyat hisoblanadi. Marixuana kabi qayta ishlanmagan moddalar bir kilogrammdan, geroin yoki kokain kabi qayta ishlangan moddalar esa besh grammdan oshsa, umrbod qamoq jazosi qo‘llanilishi mumkin.
Indoneziya migratsiya va axloq tuzatish vazirligining so‘nggi ma’lumotlariga ko‘ra, mamlakatda 530 ga yaqin odam, shu jumladan 96 nafar xorijlik, asosan giyohvand moddalar bilan bog‘liq jinoyatlar uchun o‘lim jazosiga hukm qilinishi mumkin.
Izoh (0)