Buxoro viloyati Qorako‘l tumanida ichki ishlar xodimlari ko‘chaga paketga solib tashlab ketilgan chaqaloq hayotini saqlab qolgani haqida xabar berilgan edi. Oila va xotin-qizlar qo‘mitasi holat yuzasidan munosabat bildirdi.
Unga ko‘ra, ichki ishlar organlari tomonidan ushbu holat hamda uni keltirib chiqargan sabab va omillarni aniqlash yuzasidan tergovga qadar tekshiruv harakatlari olib borilayotgani ma’lum qilindi. Qo‘mita mas’ullari tomonidan ham ushbu harakatni sodir etgan fuqaroning oilasidagi ma’naviy muhit, ijtimoiy holat yuzasidan ma’lumotlar tahlil etilmoqda.
“Oila va xotin-qizlar qo‘mitasi tizimi har qanday vaziyatda ham onaning farzandini o‘limga olib boradigan bu kabi holatda tashlab ketishini keskin qoralaydi.
Avvalo, farzand bilan bog‘liq majburiyatlarni eslatgan holda mabodo ota yoki ona o‘z farzandidan voz kechishga qaror qilgan taqdirda buning qonuniy asoslari borligini, bola hayotiga tahdid solishlik qonun bilan jazolanishi muqarrarligini ta’kidlashni o‘rinli deb biladi. Go‘daklarimizni parvarishlaylik, farzandlarimizni asraylik”, — deyiladi xabarda.
8-avgust kuni soat 01:30 larda Qorako‘l tumani markazida tungi xizmatga jalb etilgan viloyat patrul-post xizmati batalyoni tumanlararo bo‘linmasi safdor xodimi hamda tuman IIB JXX HPB profilaktika inspektori o‘zlariga biriktirib berilgan yo‘nalish hududida xizmat olib borayotganida tuman markaziy kasalxonasining gemodializ bo‘limi ro‘parasidagi binoning orqa tomonidan chaqaloq yig‘isini eshitgan. Ular shu atrofni ko‘zdan kechirganida devor yonida yashil rangli paket ichida o‘g‘il bola jinsiga mansub, taxminan, 3-5 kunlik sog‘lom holatdagi chaqaloq borligi aniqlangan.
Shu paytning o‘zida chaqaloq ichki ishlar organlari xodimlari tomonidan tuman tibbiyot birlashmasi bolalar bo‘limiga yotqizilib, zaruriy birinchi tibbiy yordam ko‘rsatilgan va soha mutaxassislari nazoratiga olingan.
Mazkur holat yuzasidan tuman IIB xodimlari tomonidan olib borilgan kechiktirib bo‘lmas tezkor surishtiruv harakatlari davomida ushbu chaqaloq 2023-yilning 4-avgust kuni yashash xonadonida hech qanday tibbiyot xodimlarisiz soat 08:00 larda dunyoga keltirilgan va 7-avgust kuni soat 21:00 atrofida onasi — 1995-yilda tug‘ilgan, Qorako‘l tumani “Mirob” mahallasida yashovchi B.Z. ismli ayol tomonidan tashlab ketilgani aniqlangan.
Hozirgi paytda holat hamda uni keltirib chiqargan sabab va omillarni aniqlash yuzasidan tergovga qadar tekshiruv harakatlari olib borilayotgan bo‘lib, yakuni yuzasidan qo‘shimcha ma’lumot beriladi.
Izoh (0)