Ukraina prezidenti Vladimir Zelenskiy kuzda “tinchlik sammiti” o‘tkazishga chaqirdi. U bu hafta Saudiya Arabistonida bo‘lib o‘tadigan muzokaralar mazkur sammitga yo‘l ochishini aytdi.
Zelenskiy 5 va 6-avgust kunlari Jiddada bo‘lib o‘tadigan yig‘ilishda qatnashadi. Unda 40 ga yaqin davlat vakillari ishtirok etadi, biroq Rossiyadan vakillar taklif etilmagan.
“Biz sammitni shu yilning kuzida o‘tkazish uchun harakat qilyapmiz. Kuz kelishiga oz qoldi, ammo sammitga tayyorgarlik ko‘rish va davlatlarning ko‘pi unda ishtirok etishi uchun hali vaqt bor”, — dedi Zelenskiy.
Zelenskiy va uning jamoasi ittifoqchilar bilan urushni tezroq tugatish maqsadida “tinchlik sammiti” o‘tkazishni qo‘llab-quvvatlamoqda.
Sammitning kun tartibi Kiyev tomonidan 2022-yil kuzda ishlab chiqilgan 10 banddan iborat rejaga asoslangan.
Undagi tinchlik konsepsiyasi Ukrainaning hududiy yaxlitligini to‘liq tiklash va Rossiya qo‘shinlarini to‘liq olib chiqish, oziq-ovqat, energiya va yadro xavfsizligini ta’minlash, barcha mahbuslarni ozod qilish va boshqa bandlarni nazarda tutadi. Sammit o‘tkaziladigan joy hali aniqlanmagan. Ukraina va G‘arb rasmiylari Rossiya sammitda ishtirok etmasligini aytdi.
Izoh (0)