Тошкент шаҳри Мирзо Улуғбек туманидаги кўп қаватли уйлардан бирида ёнғин чиқди, деб хабар беради ФВВ матбуот хизмати.
Маълум қилинишича, 6 август куни соат 18:59 да Мирзо Улуғбек тумани “Бешкапа” МФЙ Буюк Ипак Йўли кўчасида жойлашган кўп қаватли уй хонадонларининг бирида ёнғин содир бўлаётгани тўғрисида фавқулодда вазиятлар бўлимига хабар тушган.
Шунга кўра, ёнғинга соат 19:06 да етиб борилиб, соат 19:25 да ўчирилган. Ёнғинни бартараф этишга 3 та ёнғин-қутқарув экипажи, 1 та автонарвон ва 1 та ёнғин-қутқарув отряди бўлинмаси жалб этилган.
Ёнғин натижасида 15 квадрат метр майдонда уй-жиҳозлари ёниб зарарланган. Ёнғин ўчириш жараёнида ушбу уй қаватларидан 20 нафар фуқаро қутқарувчилар томонидан хавфсиз жойга эвакуация қилинган.
“Ҳодиса оқибатида тан жароҳати олган ва ҳалок бўлганлар йўқ”, — дейилади хабарда.
Бундан олдин Бухоро шаҳар Ибн Сино кўчасида жойлашган икки қаватли савдо дўконларида ёнғин содир бўлгани, Фарғонада караоке кафесида юз берган ёнғин оқибатида 6 киши ҳалок бўлгани тўғрисида хабар берилганди. 5 август куни эса Наманган вилояти Фавқулодда вазиятлар бошқармаси Чортоқ туманидаги бозорда содир бўлган ёнғин тўғрисида маълумот берди.
Изоҳ (0)