Gollivud har doim erishib bo‘lmaydigan orzular fabrikasi bo‘lib tuyulgan, u yerga tanishlarsiz va nufuzli do‘stlarsiz kirib bo‘lmaydi. Har yili yangi va iste’dodli ijodkorlar Gollivudni zabt etayotganiga qaramay, nufuzli oilalar va ularning farzandlari hali ham sanoatda hukmronlik qilmoqda.
Berrimorlar sulolasi
Bu oilaning tarixi 1874-yilda, Moris Berrimor Angliyadan Qo‘shma Shtatlarga ko‘chib, Nyu-Yorkda joylashib, Brodveyda debyut qilgan paytdan boshlangan. Bu yerda u aktyorlar oilasida o‘sgan aktrisa Jorjiana Dryu bilan tanishadi. Ular 1876-yilda turmush quradi va uch farzandning ota-onasi bo‘lishadi. Katta o‘g‘li Lionel 1931-yilda “Ozod ruh” filmidagi eng yaxshi aktyor nominatsiyasida “Oskar” oladi. Qizi Etel teatrda faoliyat olib boradi: u Aktyorlar tengligi uyushmasi (AEA) asoschilaridan biriga aylanadi — Nyu-Yorkdagi teatrlardan biri uning nomi bilan atalgan. Kichik o‘g‘li Jon Berrimor 1920-yillarda Shekspirning eng mashhur teatr aktyoriga aylanadi. Ko‘plab zamondoshlari u nafaqat san’atning rivojlanishiga, balki o‘sha davrning ko‘tarilayotgan yulduzlariga ham ta’sir ko‘rsatganini ta’kidlaydi. Merosxo‘rlari ham uning izidan boradi.
Misol uchun, uning o‘g‘li Jon Dryu Berrimor ham aktyor bo‘ladi, uning karyerasi 1990-yillarda gullab-yashnaydi. Albatta, Berrimor ismini eshitganimizda birinchi navbatda 50 dan ortiq filmlarda suratga tushgan va o‘zining Flow Films prodyuserlik kompaniyasini boshqaradigan aktrisa Dryu Berrimor ko‘z oldimizga keladi.
Bolaligidan Dryu kameralar oldida bo‘lishga odatlangan. U oilaviy biznesni munosib davom ettira oldi. Hozirda aktrisa mualliflik tok-shousini olib boradi, shouga turli mavzularni muhokama qilish uchun taniqli shaxslarni taklif qiladi.
Koppolalar sulolasi
Zamonaviy Gollivudni rejissor Frensis Ford Koppolasiz tasavvur qilib bo‘lmaydi. U “Cho‘qintirgan ota”, “Bugungi Apokalipsis” va boshqa muvaffaqiyatli loyihalarni taqdim etgan. Mashhur rejissor Jorj Lukas bilan birgalikda u bir paytlar Akira Kurosava va Jan-Lyuk Godardga Gollivudga kirishga yordam bergan kinostudiya tashkil etadi. Bundan tashqari, u qizi Sofiya Koppolaning debyut filmini suratga olishda ham mazkur kompaniyadan foydalangan. Keyinchalik u otasi kabi “Oskar” mukofotiga sazovor bo‘lgan yulduzga aylanadi. Roman Koppola ham otasining izidan boradi, ammo hozircha faqat “Oskar”ga nomzod bo‘la oldi xolos. Yana bir merosxo‘r — Jan-Karlo Koppola kinoprodyuser edi, uning qizi Gia aktrisa bo‘ldi, ammo uning filmografiyasida yorqin loyihalar yo‘q.
Frensis Fordning singlisi Taliya Shayr ikki marta “Oskar”ga nomzod bo‘lgan. Aynan u taniqli aktyor Jeyson Shvartsmanning onasi bo‘lib, uni taniqli qarindoshlarning loyihalarida ham, Ues Anderson va boshqa Gollivud rejissorlarining filmlarida ham ko‘rish mumkin. Koppolaning boshqa ukasi — Avgust soyada qolgan bo‘lsa-da, hali ham shou-biznesdagi nufuzli shaxs hisoblanadi. Uning o‘g‘li Nikolas Keyj anchadan beri ommaning sevimli aktyori. Ko‘pchilik “Oskar” mukofotiga sazovor bo‘lgan aktyor mashhur sulola avlodi ekanini bilmaydi — u taniqli sulolaga aloqador bo‘lmaslik uchun ham o‘ziga taxallus olgan.
Fondalar sulolasi
Bu oilaning tarixi ham XX asrga borib taqaladi — Genri Fonda o‘z faoliyatini 1935-yilda boshlagan. U 80 dan ortiq filmlarda rol o‘ynaydi, lekin faqat 76 yoshida o‘zi orzu qilgan “Oskar”ni oladi. Aytgancha, o‘sha filmda Genri qizi Jeyn bilan birga rol o‘ynagan. Aktyorning qizi ham mashhur aktrisaga aylanadi, u tijoriy jihatdan muvaffaqiyatli loyihalarga taklif qilinadi, Jeyn Fonda ikki marta “Oskar” haykalchasiga munosib ko‘riladi.
Akasi Piter ham Gollivudda mashhur bo‘lib, nafaqat taniqli aktyor, balki rejissor va ssenariy muallifi hisoblanadi. Aytgancha, ularning merosxo‘rlari Brijit Fonda va Troy Geriti mashhur ota-onalarining izidan borishgan. Brijit Fonda hatto Koppolaning uchinchi “Cho‘qintirgan ota” filmida ham rol o‘ynagan.
Izoh (0)