Голливуд ҳар доим эришиб бўлмайдиган орзулар фабрикаси бўлиб туюлган, у ерга танишларсиз ва нуфузли дўстларсиз кириб бўлмайди. Ҳар йили янги ва истеъдодли ижодкорлар Голливудни забт этаётганига қарамай, нуфузли оилалар ва уларнинг фарзандлари ҳали ҳам саноатда ҳукмронлик қилмоқда.
Бэрримор лар сулоласи
Бу оиланинг тарихи 1874 йилда, Морис Бэрримор Англиядан Қўшма Штатларга кўчиб, Нью-Йоркда жойлашиб, Бродвейда дебют қилган пайтдан бошланган. Бу ерда у актёрлар оиласида ўсган актриса Жоржиана Дрю билан танишади. Улар 1876 йилда турмуш қуради ва уч фарзанднинг ота-онаси бўлишади. Катта ўғли Лионель 1931 йилда “Озод руҳ” фильмидаги энг яхши актёр номинациясида “Оскар” олади. Қизи Этел театрда фаолият олиб боради: у Актёрлар тенглиги уюшмаси (АEА) асосчиларидан бирига айланади — Нью-Йоркдаги театрлардан бири унинг номи билан аталган. Кичик ўғли Жон Бэрримор 1920 йилларда Шекспирнинг энг машҳур театр актёрига айланади. Кўплаб замондошлари у нафақат санъатнинг ривожланишига, балки ўша даврнинг кўтарилаётган юлдузларига ҳам таъсир кўрсатганини таъкидлайди. Меросхўрлари ҳам унинг изидан боради.
Мисол учун, унинг ўғли Жон Дрю Бэрримор ҳам актёр бўлади, унинг карьераси 1990 йилларда гуллаб-яшнайди. Албатта, Бэрримор исмини эшитганимизда биринчи навбатда 50 дан ортиқ фильмларда суратга тушган ва ўзининг Flow Films продюсерлик компаниясини бошқарадиган актриса Дрю Бэрримор кўз олдимизга келади.
Болалигидан Дрю камералар олдида бўлишга одатланган. У оилавий бизнесни муносиб давом эттира олди. Ҳозирда актриса муаллифлик ток-шоусини олиб боради, шоуга турли мавзуларни муҳокама қилиш учун таниқли шахсларни таклиф қилади.
Копполалар сулоласи
Замонавий Голливудни режиссёр Фрэнсис Форд Копполасиз тасаввур қилиб бўлмайди. У “Чўқинтирган ота”, “Бугунги Апокалипсис” ва бошқа муваффақиятли лойиҳаларни тақдим этган. Машҳур режиссёр Жорж Лукас билан биргаликда у бир пайтлар Акира Куросава ва Жан-Люк Годардга Голливудга киришга ёрдам берган киностудия ташкил этади. Бундан ташқари, у қизи София Копполанинг дебют фильмини суратга олишда ҳам мазкур компаниядан фойдаланган. Кейинчалик у отаси каби “Оскар” мукофотига сазовор бўлган юлдузга айланади. Роман Коппола ҳам отасининг изидан боради, аммо ҳозирча фақат “Оскар”га номзод бўла олди холос. Яна бир меросхўр — Жан-Карло Коппола кинопродюсер эди, унинг қизи Гиа актриса бўлди, аммо унинг фильмографиясида ёрқин лойиҳалар йўқ.
Фрэнсис Форднинг синглиси Талия Шайр икки марта “Оскар”га номзод бўлган. Айнан у таниқли актёр Жейсон Шварцманнинг онаси бўлиб, уни таниқли қариндошларнинг лойиҳаларида ҳам, Уэс Андерсон ва бошқа Голливуд режиссёрларининг фильмларида ҳам кўриш мумкин. Копполанинг бошқа укаси — Август сояда қолган бўлса-да, ҳали ҳам шоу-бизнесдаги нуфузли шахс ҳисобланади. Унинг ўғли Николас Кейж анчадан бери омманинг севимли актёри. Кўпчилик “Оскар” мукофотига сазовор бўлган актёр машҳур сулола авлоди эканини билмайди — у таниқли сулолага алоқадор бўлмаслик учун ҳам ўзига тахаллус олган.
Фондалар сулоласи
Бу оиланинг тарихи ҳам ХХ асрга бориб тақалади — Генри Фонда ўз фаолиятини 1935 йилда бошлаган. У 80 дан ортиқ фильмларда рол ўйнайди, лекин фақат 76 ёшида ўзи орзу қилган “Оскар”ни олади. Айтганча, ўша фильмда Генри қизи Жейн билан бирга рол ўйнаган. Актёрнинг қизи ҳам машҳур актрисага айланади, у тижорий жиҳатдан муваффақиятли лойиҳаларга таклиф қилинади, Жейн Фонда икки марта “Оскар” ҳайкалчасига муносиб кўрилади.
Акаси Питер ҳам Голливудда машҳур бўлиб, нафақат таниқли актёр, балки режиссёр ва сценарий муаллифи ҳисобланади. Айтганча, уларнинг меросхўрлари Брижит Фонда ва Трой Гэрити машҳур ота-оналарининг изидан боришган. Брижит Фонда ҳатто Копполанинг учинчи “Чўқинтирган ота” фильмида ҳам рол ўйнаган.
Изоҳ (0)