Ulug‘bek Qodirov bu yil 40 yoshni qarshilagan bo‘lishiga qaramay hamon oshiq yigitlar rolini maromiga yetkazib ijro etadi. Ma’lum sabablarga ko‘ra, bir muddat ijoddan yiroqlashgan aktyor yana kinoga qaytdi. Tasodifan san’at olamiga kirib kelgan Ulug‘bek Qodirov faoliyati davomida qanday qiyinchiliklarga uchragan. Keling, bu haqda atroflicha ma’lumot beramiz.
“Ko‘richak sabab harbiy bo‘lolmaganman”
Nosir va Farida Qodirovalar kenja o‘g‘illarining harbiy soha vakili bo‘lishini orzu qilishadi. Chunki uning bo‘ylari baland, sportga bo‘lgan qiziqishi ham yuqori edi. Afsuski, yosh Ulug‘bekka harbiy bo‘lish nasib etmadi.
— Ota-onam haqiqatan ham harbiy bo‘lishimni orzu qilishgandi. 15 yoshimda Toshkentdagi Suvorov nomli harbiy bilim yurtiga o‘qishga kirdim, ammo uni bitirish menga nasib qilmadi. Kutilmaganda ko‘richak bo‘lib qoldim. Jarrohlik operatsiyasidan keyin shifokorlar jismoniy mashqlar bajarishni ma’lum muddatga taqiqlashdi. Ota-onam meni oddiy maktabga qaytarishga qaror qilishdi. Shunday qilib, harbiylik kasbi haqidagi orzu o‘z-o‘zidan barham topdi. Ammo bolaligimdan sportga qiziqishim yuqori bo‘lgan. Ammo o‘zim ham, atrofimdagi insonlar ham aktyor bo‘lishimni xayollariga keltirishmagan.
Bolaligim boshqalarnikidan farqli o‘tgan deyolmayman. Ota-onam kun bo‘yi ishda bo‘lishardi, biz esa uyda qolardik. Onam uy ishlarini barchamizga bo‘lib ketardi. Hamma zimmasiga yuklatilgan ishni qilishga majbur edi. Dadam o‘qimishli inson bo‘lgani uchun “Saodat” jurnaliga obuna bo‘lardi. Ishga ketayotganda jurnalning qaysi sahifalarini o‘qishimizni ham belgilab ketishardi, — deydi aktyor Ulug‘bek Qodirov.
“Artist bo‘laman, qonim to‘kildi”
San’at institutiga hujjatlarimni tasodifan topshirganman. Institut binosi oldida ro‘y bergan voqeani taqdirning belgisi sifatida qabul qilganman.
— Bahorning iliq kunlarining birida do‘stlarim bilan Toshkentdagi Alisher Navoiy nomli milliy bog‘ga aylangani bordik. O‘sha kunlari onam menga yangi poyabzal olib bergandilar. Ko‘p yurganimdan tufli oyog‘imni shilib tashladi. Ammo yurishdan to‘xtamadim. Shunda xayolimga san’at institutining oldiga yetib olsam bo‘ldi, degan fikr keldi. Institut binosi oldiga yetib borganimda, oyog‘im yanada, ko‘proq qonay boshladi. Bu qon institut darvozasi oldiga to‘kildi. O‘sha kuni kechqurun onamga “San’at institutiga hujjat topshiraman!” deb aytdim. Onam “Bu nima deganing?” deb hayron bo‘ldilar. “Qonim to‘kilgan joyga o‘qishga kirmasam bo‘lmaydi” deya javob berganman”, — deydi Ulug‘bek Qodirov.
“Ilk rolim epizod bo‘lgan”
Aktyor 2000-yil O‘zbekiston davlat san’at va madaniyat institutiga qabul qilingan. U institutning eng ko‘rkam talabalaridan biri bo‘lishiga qaramay, ko‘pchilik uning sahnaga moslashib ketishiga shubha qilgandi. Bunga aktyorning injiqligi va biroz jizzakiligi sabab bo‘lgan bo‘lsa ajabmas.
— Ilk rolimni 2001-yili “Ayol zoti” serialida ijro etganman. “Kastingdan o‘tding”, deyishganida rosa xursand bo‘lgandim. Ammo kichik epizodga tasdiqlashgan ekan. Kamera qarshisida hayajon albatta bo‘lgan, ammo rolga moslashishim qiyin kechmagan. 2004-yili institutni bitirgandan so‘ng ketma-ket yangi filmlarga takliflar bo‘ldi. “Devona” va “Sarvinoz” filmlarida suratga tushganimdan keyin odamlar taniy boshlashdi, — deydi aktyor.
“Otamdan ayrilib qoldik”
Aktyorning muvaffaqiyatli rollari ko‘p, ammo uning tanilishida “Sarvinoz” va “Baxt uchun million” rollari ko‘proq hissa qo‘shgan. Chunki 2005-yilda unga “Yilning eng yaxshi aktyori” nominatsiyasida g‘oliblik nasib etgan.
— 2004-yili ijodimdagi eng barakali yillardan biri bo‘lgan. Ammo hayotimda og‘ir judolik bo‘lgani bilan ham xotiramda qolib ketgan. Chunki endi tanilib, filmlarim namoyish etilayotgan pallada otamdan ayrilib qolganmiz. Otamga filmlarimni ko‘rish, premyeralarda old qatorda o‘tirib, tomosha qilish nasib etmagan. Bundan ko‘p afsuslanaman, — deydi aktyor Ulug‘bek Qodirov.
Ulug‘bek Qodirov bir oy yashab, ajrashgan...
Aktyor Ulug‘bek Qodirov 2012-yilning sentabr oyida ota-onasining qistovi bilan uylangan. To‘y katta dabdaba bilan o‘tgan bo‘lishiga qaramay, kuyov bir oydan keyin ajrashishga qaror qilgan. Mish-mishlarga qaraganda, bunga kelinni yoqtirmay uylangani sabab bo‘lgan. 2013-yilning aprel oyida esa aktyor “Shahrizoda” guruhining a’zosi Aziza bilan oila qurgan. Ular 2014-yili qiz, 2016-yilda esa o‘g‘il farzandli bo‘lishganini ma’lum qilishdi.
Rol uchun 25 kg vazn yo‘qotgan
Aktyor Ulug‘bek Qodirov uchun qisqa muddatda ozish yoki semirish muammo emas. U “Aka” filmi uchun 26 kilogrammga semirgan. “Baron” filmi uchun esa avvalgi vazniga qaytishiga to‘g‘ri kelgan. Aktyor qisqa vaqtda 25 kilogramm vazn tashlashga muvaffaq bo‘lgan. Aktyorning ta’kidlashicha, u to‘plagan 120 kilogramm vazndan rol va salomatligi uchun voz kechishiga to‘g‘ri kelgan.
— Bu yil ham rol uchun katta vazn tashlashimga to‘g‘ri keldi. “Osiyo arsloni” filmida asosiy rolni ijro etyapman. Kuchaytirilgan parhez sabab 25 kilogramm vazn tashladim, — deydi aktyor Ulug‘bek Qodirov.
“Ulug‘bekni O‘zbekistonda xafa qilishgandi”
Ulug‘bek Qodirov oilasi bilan AQSHga ko‘chib ketganligi ma’lum qilgandi. Ammo biror marta xorijga ketishining sabablarini ochiqlamadi. Faqatgina uning yaqin do‘sti va sport murabbiysi Habibulla Nizomov buning ayrim sabablarini ma’lum qilgandi.
— Filmlarda o‘zbek aktyorlariga salbiy rol yoki ikkinchi darajali rollarni berib, asosiy rollar rus yoki turk aktyorlariga berila boshladi. Bir filmda kelishilgan gonorarni berishmagan. Qayta-qayta so‘rab, agar pulimni bermasangiz, dublyajga bormayman, deganidan keyin kinoni buyurtma qilgan tashkilotga ro‘para qilib qo‘ygan. Tasavvur qiling, gonorarni kelishgan odam qo‘rqitish uchun boshqa tashkilotni ro‘para qilib qo‘ygan. Balki, adolatsizliklarni ko‘rib, men o‘zim yangidan hayot boshlab, alohida yashab ko‘ray, degandir, — degandi Habibulla Nizomov.
AQSHda pitssa tarqatish bilan shug‘ullanganmi?
Aktyor birorta intervyusida AQSHdagi faoliyati haqida gapirmagan bo‘lsa-da, tinib-tinchimas muxlislar uning nima bilan shug‘ullanganligini aniqlashgan. U barcha muhojirlar singari pitssa tarqatish bilan shug‘ullangan emish.
Muhimi, aktyor 3-4 yillik xorij safaridan so‘ng O‘zbekistonga qaytdi va ayni kunlarda “Alfons” serialida suratga tushmoqda.
Izoh (0)