Margo Robbi va Rayan Gosling ishtirokidagi “Barbi” komediyasi jahon prokatida 1 milliard dollar to‘pladi.
Umumiy 1,031 milliard dollar miqdoridagi daromaddan 459,4 million dollari Shimoliy Amerikadan, 572,1 million dollari esa xalqaro hududlardan to‘plangan.
“Barbi” loyihasi milliard dollarlik marraga erishishi uchun 17 kun kerak bo‘ldi. Rejissor Greta Gervig filmi jahon prokatida 1 milliard dollar ishlab topgan ilk ayol rejissorga aylandi. 2019-yilda Anna Boden va Rayan Flekning “Kapitan Marvel” filmi 1,1 milliard dollar daromad keltirgan edi.
“Barbi” sujeti ekzistensial inqirozni yengib o‘tgan mashhur Barbi qo‘g‘irchog‘i haqida hikoya qiladi. U Ken bilan birga haqiqiy dunyoga boradi, bu yerdagi hech bir narsa ideal bo‘lmaydi. Shuningdek, filmda Amerika Ferrera, Maykl Sera, Uill Ferrell, Keyt Makkinnon, Simu Lyu, Shuti Gatva, Emma Makki va boshqa aktyorlar rol o‘ynagan.
Gervig film ssenariysini Noa Baumbax (“Nikoh tarixi” filmi ssenariysi muallifi) bilan birga yozgan. “Barbi”ning budjeti 145 million dollarni tashkil etdi. Hozircha loyihaning davomini suratga olish rejalashtirilmagan.
Ma’lumot uchun, “Barbi” filmiga raqobatchi bo‘lgan loyiha — “Oppengeymer” dunyo bo‘ylab 500 million dollar to‘plashga muvaffaq bo‘ldi.
Daromadning 208 million dollari AQSHdan, 260 million dollardan ortig‘i esa xalqaro hududlardan yig‘ilgan. “Oppengeymer” shu hafta oxiri kassada Nolanning yana bir loyihasi “Dyunkerk”ni ortda qoldirishi kutilmoqda. Filmning budjeti 100 million dollarni tashkil etgan.
Uch soatlik film dunyodagi birinchi atom bombasining yaratuvchisi Robert Oppengeymer ( loyihada ushbu rolni Killian Myorfi ijro etgan) haqida hikoya qiladi. Filmda Emili Blant, Robert Dauni, Mett Deymon va Florens Pyu ham rol o‘ynagan.
Izoh (0)