Грета Гервиг фильми жаҳон прокатида 1 миллиард доллар ишлаб топган илк аёл режиссёрга айланди

Марго Робби ва Райан Гослинг иштирокидаги “Барби” комедияси жаҳон прокатида 1 миллиард доллар тўплади.

Умумий 1,031 миллиард доллар миқдоридаги даромаддан 459,4 миллион доллари Шимолий Америкадан, 572,1 миллион доллари эса халқаро ҳудудлардан тўпланган.   

“Барби” лойиҳаси миллиард долларлик маррага эришиши учун 17 кун керак бўлди. Режиссёр Грета Гервиг фильми жаҳон прокатида 1 миллиард доллар ишлаб топган илк аёл режиссёрга айланди. 2019 йилда Анна Боден ва Райан Флекнинг “Капитан Maрвел” фильми 1,1 миллиард доллар даромад келтирган эди.

“Барби” сюжети экзистенсиал инқирозни енгиб ўтган машҳур Барби қўғирчоғи ҳақида ҳикоя қилади. У Кен билан бирга ҳақиқий дунёга боради, бу ердаги ҳеч бир нарса идеал бўлмайди. Шунингдек, фильмда Америка Феррера, Майкл Сера, Уилл Феррелл, Кейт Маккиннон, Симу Лю, Шути Гатва, Эмма Макки ва бошқа актёрлар рол ўйнаган.

Гервиг фильм сценарийсини Ноа Баумбах (“Никоҳ тарихи” фильми сценарийси муаллифи) билан бирга ёзган. “Барби”нинг бюджети 145 миллион долларни ташкил этди. Ҳозирча лойиҳанинг давомини суратга олиш режалаштирилмаган.

Маълумот учун, “Барби” фильмига рақобатчи бўлган лойиҳа — “Оппенгеймер” дунё бўйлаб 500 миллион доллар тўплашга муваффақ бўлди.

Даромаднинг 208 миллион доллари АҚШдан, 260 миллион доллардан ортиғи эса халқаро ҳудудлардан йиғилган. “Оппенгеймер” шу ҳафта охири кассада Ноланнинг яна бир лойиҳаси “Дюнкерк”ни ортда қолдириши кутилмоқда. Фильмнинг бюджети 100 миллион долларни ташкил этган.

Уч соатлик фильм дунёдаги биринчи атом бомбасининг яратувчиси Роберт Оппенгеймер ( лойиҳада ушбу ролни Киллиан Мёрфи ижро этган) ҳақида ҳикоя қилади. Фильмда Эмили Блант, Роберт Дауни, Метт Деймон ва Флоренс Пю ҳам рол ўйнаган.