Фарғона вилояти ҳокимига биринчи ўринбосар тайинланди, деб хабар бермоқда ЎзА ахборот хизмати.
Маълум қилинишича, Ҳабиб Сирожиддинов Фарғона вилояти ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари этиб тайинланди. Тайинловга қадар Ҳабиб Сирожиддинов Давлат активларини бошқариш агентлиги Фарғона вилояти ҳудудий бошқармаси бошлиғи лавозимида ишлаган.
Бундан аввал Қўқон шаҳрида президент Шавкат Мирзиёев раислигида йиғилиш бўлиб ўтган эди. Унда президент тўғридан тўғри хорижий инвестиция жалб қилиш бўйича Фарғона вилоятидаги айрим туман ва шаҳарларнинг кўрсаткичлари қониқарсизлигини кўрсатиб ўтди, саноат ҳажми бўйича республикада 12-ўринга тушиб қолгани танқид қилинди, қатор ҳокимлар ва бошқарма бошлиқлари лавозимидан озод қилинди, туманларнинг барчаси йил якунигача 100 млн доллардан инвестиция жалб қилиши мумкинлиги айтилди, Қувада лойиҳалар ишга тушиши натижасида 10 мингдан зиёд иш ўрни яратиш мумкинлиги ва бу лойиҳалар ҳисобига хориждаги 6 минг нафар мигрантимизни қайтиб келиши учун муҳит яратилиши қайд этилди.
Шунингдек, давлат раҳбари вилоятда жиноятчилик ва ҳуқуқбузарликларга қарши курашиш масаласига алоҳида тўхталиб, бу борадаги ишлар аҳволи қониқарсизлигини танқид қилди. Фаолиятида йўл қўйган камчиликлар учун Фарғона вилояти ички ишлар бошқармаси бошлиғи М.Жўраев лавозимидан озод этилди.
Изоҳ (0)