Ijtimoiy tarmoqlar va ayrim saytlarda Qozog‘istonga Amerikaning avval Ukrainada ishlagan 30 ta biologik laboratoriyasi joylashtirilgani haqida ma’lumotlar tarqaldi, deb yozmoqda Tengrinews.
Respublika Sog‘liqni saqlash vazirligi ushbu xabarlarga izoh berdi.
“Bu feyk, boshqa davlatlarning biolaboratoriyalarini Qozog‘iston Respublikasi hududiga joylashtirish rejalashtirilmagan va rejalashtirilmayapti ham”, — deyiladi Sog‘liqni saqlash vazirligi xabarida.
So‘nggi bir necha yil ichida xorijiy OAV va ijtimoiy tarmoqlarda go‘yoki AQSH biolaboratoriyasida biologik qurollar yaratilayotgani haqida maʼlumotlar tarqalmoqda. Bu va boshqa mish-mishlar mutaxassislar tomonidan rad etilgan.
2022-yil noyabr oyida AQSHning Qozog‘istondagi elchisi Deniel Rozenblyum Olmaotadagi biolaboratoriya atrofidagi mish-mishlarga izoh bergandi.
“Qo‘shma Shtatlar Qozog‘iston va mintaqada so‘nggi 30 yil ichida qilgan barcha ishlarini hukumat bilan hamkorlikda va ularning ruxsati bilan amalga oshirdi. Xususan, ommaviy qirg‘in qurollarini tarqatmaslik bo‘yicha so‘zsiz kelishuvlar bor. Propagandachilarning bu kabi axborot hujumlari shunday tushuniladiki, ular Qozog‘iston va boshqa davlatlar hukumatlarini, aytish mumkinki, aldash oson bo‘lgan ahmoqlar, deb hisoblaydi. Menimcha, bu nafaqat Qozog‘iston, balki Gruziya, Ukraina hukumati va hamma uchun haqorat. Hozir jahon amaliyotida hamma aynan ommaviy qurollarni tarqatmaslik bilan shug‘ullanmoqda”, — deb ta’kidlagan Rozenblyum.
Izoh (0)