Экология, атроф-муҳитни муҳофаза қилиш ва иқлим ўзгариши вазирлигининг Айдар-Арнасой кўллар тизими давлат инспекторлари ҳамда Жиззах вилоят прокуратураси ходимлари билан ҳамкорликда навбатдаги рейд тадбири бўлиб ўтди. Бу ҳақда вазирлик матбуот хизмати хабар берди.
Маълум қилинишича, Айдар-Арнасой кўллар тизими, Тузкон бўлими ҳудудида ўтказилган рейд давомида тумандаги “Бахтли” МФЙ, “Наврўз” қўрғонида яшовчи фуқаро Ш.М. томонидан саноатбоп ўлчамдан кичик бўлган жами 175 бош оқсила (“судак”) балиқлари ноқонуний равишда овлангани аниқланган.
Қонун бузилиши натижасида ҳайвонот дунёсига 57 миллион 750 минг сўм зарар етказилган.
Ашёвий далил сифатида ноқонуний равишда овланган балиқ маҳсулотлари ҳамда 1 дона “Прогресс” русумли қайиқ ва 1 дона “YAMAHA-30” русумли қайиқ моторлари олиб қўйилган.
Ушбу ҳолатда жиноят аломатлари борлиги сабабли тўпланган ҳужжатлар Жиззах вилоят прокуратурасига юборилган.
- Бир неча кун олдин Жиззах вилоятида 541 та балиқ ноқонуний овланиб, табиатга 178 миллион 530 минг сўм зарар етказилгани аниқланганди.
- Ушбу ҳудудда апрель ойида ўтказилган рейд давомида электр қармоқлардан фойдаланган ҳолда ноқонуний балиқ овлаётганлар аниқланганди.
- Ўшанда фуқаролардан бири хизмат вазифасини бажараётган ходимларнинг қонуний талабларини бажармасдан, уларга фаол қаршилик кўрсатиб, ноқонуний овлаган балиқлари ва бошқа ашёвий далилларни йўқ қилиш мақсадида ўзининг Nexia-3 ни департамент бўлим бошлиғи устига ҳайдаб, унинг ҳаёти ва соғлиғига хавф туғдириш орқали тан жароҳати етказганди.
Изоҳ (0)