O‘zbekiston ichki bozorlarida shakarning chakana narxi yil boshiga nisbatan 10 foizga pasaydi. Bu haqda Raqobatni rivojlantirish va iste’molchilar huquqlarini himoya qilish qo‘mitasi tahlilida keltirilgan.
Qayd etilishicha, respublikada yillik umumiy ishlab chiqarish quvvati 900 ming tonnadan ortiq bo‘lgan mahalliy shakar ishlab chiqaruvchi (“Xorazm shakar” MChJ va “Angren shakar” MChJ) korxonalarning ichki ehtiyojini (o‘rtacha 650 ming tonna) 138 foizdan ortig‘ini qoplash imkoniyati mavjud.
Bugungi kunda birja savdolarida kunlik qo‘yilayotgan 2,6 ming tonna shakar mahsulotining 2,1 ming tonna yoki 68 foizi 1 kilogramm uchun o‘rtacha 10 666 so‘mdan realizatsiya qilinib, o‘rtacha boshlang‘ich narxga (11 001 so‘m) nisbatan o‘sish 3 foizni tashkil etmoqda.
Mahalliy korxonalar tomonidan 2023-yil yanvar—iyun oylarida birja savdolariga jami 336,7 ming tonna shakar qo‘yilib, 280,1 ming tonnasi (83 foizi) sotilgan.
Iyun oyida shakarning 1 tonnasi uchun o‘rtacha sotilish narxi spot bitimlarida 11,5 million so‘mgacha (may oyida — 13,3 million so‘m) o‘rtacha 14 foizga va forvard bitimlarida 10,7 million so‘mgacha (may oyida — 12,5 million so‘m) o‘rtacha 15 foizga pasayganligi kuzatilmoqda.
O‘z navbatida, mazkur holat chakana narxlarga ham ta’sir etib, bugungi kunda ichki bozorlarda shakarning chakana narxi 12 000—13 500 so‘mgacha tushganligi kuzatilmoqda yoki yil boshiga (13 500—14 500 so‘mni) nisbatan 10 foizga pasaygan.
“Bugungi kunda mahalliy shakar zavodlari shakar xomashyosini Braziliya davlatidan xarid qilmoqda. Xususan, 3-iyul holatiga mazkur zavodlarda 389 ming tonna shakar mahsuloti resurslari mavjud hamda arzon narxlarda xomashyo yetkazib berish bo‘yicha uzoq muddatli shartnomalar imzolangan. Shundan, omborda 3 ming tonna tayyor shakar va 72 ming tonna xomashyo, avgust oyiga qadar 314 ming tonna xomashyo yetkazib beriladi”, — deyiladi xabarda.
Qo‘mitaga ko‘ra, shakar mahsuloti narxlarining keskin oshishi hamda vujudga kelishi mumkin bo‘lgan holatlar oldini olish bo‘yicha zarur chora-tadbirlar ishlab chiqilgan va doimiy nazorat o‘rnatilgan.
O‘zbekistonda shakar mahsuloti zaxirasi
Ichki bozorni shakar mahsuloti bilan uzluksiz taʼminlash maqsadida mahalliy shakar ishlab chiqaruvchilar tomonidan ishlab chiqarish quvvatlarini modernizatsiya qilish ishlari olib borilmoqda va birinchi bosqichida (1-mayga qadar) shakar ishlab chiqarish quvvatlarini o‘tgan yilga nisbatan 25 foizga oshirilishi, natijada sutkasiga 2,5 ming tonnagacha shakar ishlab chiqarilishi rejalashtirilgan edi. Bunda, yillik shakar ishlab chiqarish 600 ming tonnadan 1 million tonnagacha oshishi kutilmoqda.
Raqobatni rivojlantirish va iste’molchilar huquqlarini himoya qilish qo‘mitasiga ko‘ra, respublika aholisini yetarli miqdorda va maqbul narxlarda shakar va un mahsulotlari bilan taʼminlash bo‘yicha hukumat tomonidan zarur choralar ko‘rilgan.
Izoh (0)