Jek Smit boshchiligida AQSH Adliya vazirligining bir guruh prokurorlari sobiq prezident Donald Trampga maxfiy hujjatlarni noqonuniy saqlash ishi bo‘yicha yangi ayblovlar qo‘ydi.
The New York Times gazetasining yozishicha, ayblov xulosasining yangi tahririga “dalillarni qisman o‘zgartirish, yo‘q qilish, buzib ko‘rsatish yoki yashirish” ishi bo‘yicha uchta yangi band kiritilgan.
Shuningdek, bu ishga yangi ayblanuvchi tortildi. Donald Trampning o‘zi va shaxsiy yordamchisi Uolt Nautdan tashqari uning Floridadagi Mar-a-Lago mulkida texnik xodim bo‘lgan Karlos de Oliveyra jarayonda ayblanuvchiga aylandi. Prokurorlarning so‘zlariga ko‘ra, Tramp aynan unga o‘z qarorgohidagi maxfiy hujjatlar saqlanadigan yerto‘ladan kuzatuv kameralari tasvirlarini yo‘q qilishni buyurgan. De Oliveyra 31-iyul kuni Mayamidagi sudda ishtirok etishi kerak.
Tramp va Nauta avvalroq o‘ziga qo‘yilgan ayblovlarni rad etgandi.
Donald Tramp hozirgacha ikki marta sudga tortildi. 2023-yilning aprel oyida u ish hisobotlarini soxtalashtirish bo‘yicha qo‘zg‘atilgan jinoiy ish doirasida politsiyaga topshirilgan. Tramp ustidan sud jarayoni 2024-yilning mart oyida boshlanadi. Iyun oyida u maxfiy hujjatlarni noqonuniy saqlashda rasman ayblandi.
Tramp federal darajada ayblangan birinchi AQSH prezidentiga aylandi. Shu bilan birga, u bo‘lajak saylovlarda Respublikachilar partiyasidan prezidentlikka favorit nomzod hisoblanadi. Tramp aybdor deb topilib, qamoqqa yuborilgan taqdirda ham AQSH prezidentligiga nomzodini qo‘yishi mumkin.
Izoh (0)