Жек Смит бошчилигида АҚШ Адлия вазирлигининг бир гуруҳ прокурорлари собиқ президент Дональд Трампга махфий ҳужжатларни ноқонуний сақлаш иши бўйича янги айбловлар қўйди.
The New York Times газетасининг ёзишича, айблов хулосасининг янги таҳририга “далилларни қисман ўзгартириш, йўқ қилиш, бузиб кўрсатиш ёки яшириш” иши бўйича учта янги банд киритилган.
Шунингдек, бу ишга янги айбланувчи тортилди. Дональд Трампнинг ўзи ва шахсий ёрдамчиси Уолт Наутдан ташқари унинг Флоридадаги Мар-а-Лаго мулкида техник ходим бўлган Карлос де Оливейра жараёнда айбланувчига айланди. Прокурорларнинг сўзларига кўра, Трамп айнан унга ўз қароргоҳидаги махфий ҳужжатлар сақланадиган ертўладан кузатув камералари тасвирларини йўқ қилишни буюрган. Де Оливейра 31 июль куни Майамидаги судда иштирок этиши керак.
Трамп ва Наута аввалроқ ўзига қўйилган айбловларни рад этганди.
Дональд Трамп ҳозиргача икки марта судга тортилди. 2023 йилнинг апрель ойида у иш ҳисоботларини сохталаштириш бўйича қўзғатилган жиноий иш доирасида полицияга топширилган. Трамп устидан суд жараёни 2024 йилнинг март ойида бошланади. Июнь ойида у махфий ҳужжатларни ноқонуний сақлашда расман айбланди.
Трамп федерал даражада айбланган биринчи АҚШ президентига айланди. Шу билан бирга, у бўлажак сайловларда Республикачилар партиясидан президентликка фаворит номзод ҳисобланади. Трамп айбдор деб топилиб, қамоққа юборилган тақдирда ҳам АҚШ президентлигига номзодини қўйиши мумкин.
Изоҳ (0)