Andijon viloyati prokuraturasi Qo‘rg‘ontepa tumanida ichki ishlar xodimlari fuqaroni kaltaklagani aytilgan xabarlarga munosabat bildirdi.
Ijtimoiy tarmoqlarda bir fuqaroning ichki ishlar xodimlari tomonidan dubinka bilan kaltaklangani aytilgan video tarqaldi. Jabrlanuvchiga ko‘ra, uning qo‘llarini kishanlab, to‘rt nafar IIB xodimi son qismiga dubinka bilan urgan.
Viloyat prokuraturasining ma’lum qilishicha, fuqaro M.G‘.ning tan jarohatlari olgani holati bo‘yicha Qo‘rg‘ontepa tuman prokuraturasi tomonidan tergovga qadar tekshiruv harakatlari olib borilmoqda.
Tergovga qadar tekshiruv davrida sudga oid ekspertiza va IIB xodimlarining xatti-harakatlari yuzasidan xizmat tekshiruvi tayinlangan. Tekshiruvda xabarda ko‘rsatilgan barcha vajlar har tomonlama va to‘liq o‘rganilib, natijasi bo‘yicha qonuniy qaror qabul qilinadi.
“Tergovga qadar tekshiruv harakatlari viloyat prokuraturasi tomonidan nazoratga olingan”, — deyiladi munosabatda.
Eslatib o‘tamiz, Andijon viloyatining Shahrixon tumanida yashagan 32 yoshli S.M. 2022-yil 21-mart kuni IIB xodimlari va bir nafar mahkum tomonidan qiynoqqa solinishi oqibatida tergov hibsxonasida vafot etgandi. Sud marhumning o‘limiga sababchi deb topgan IIV JIEDga qarashli 3-son tergov hibsxonasida ishlovchi 6 nafar xodimning har birini 1 yil 6 oy muddatga ichki ishlar organlari tizimida ishlash huquqidan mahrum qilgan holda 4 yil muddatga ozodlikdan mahrum qilgandi. Shuningdek, qolgan 6 nafar xodim esa 1 yil 6 oy muddatga ichki ishlar organlari tizimi va shifokorlik lavozimlarida ishlash huquqidan mahrum etilib, 3 yilga ozodlikni cheklash jazosi bilan jazolangandi. Bundan tashqari, marhum mahbusni kamerada kaltaklagan mahkum J.U.ga 4 yil 1 oy muddatga ozodlikdan mahrum qilish jazosi tayinlangan.
Izoh (0)