Андижон вилояти прокуратураси Қўрғонтепа туманида ички ишлар ходимлари фуқарони калтаклагани айтилган хабарларга муносабат билдирди.
Ижтимоий тармоқларда бир фуқаронинг ички ишлар ходимлари томонидан дубинка билан калтаклангани айтилган видео тарқалди. Жабрланувчига кўра, унинг қўлларини кишанлаб, тўрт нафар ИИБ ходими сон қисмига дубинка билан урган.
Вилоят прокуратурасининг маълум қилишича, фуқаро М.Ғ.нинг тан жароҳатлари олгани ҳолати бўйича Қўрғонтепа туман прокуратураси томонидан терговга қадар текширув ҳаракатлари олиб борилмоқда.
Терговга қадар текширув даврида судга оид экспертиза ва ИИБ ходимларининг хатти-ҳаракатлари юзасидан хизмат текшируви тайинланган. Текширувда хабарда кўрсатилган барча важлар ҳар томонлама ва тўлиқ ўрганилиб, натижаси бўйича қонуний қарор қабул қилинади.
“Терговга қадар текширув ҳаракатлари вилоят прокуратураси томонидан назоратга олинган”, — дейилади муносабатда.
Эслатиб ўтамиз, Андижон вилоятининг Шаҳрихон туманида яшаган 32 ёшли С.М. 2022 йил 21 март куни ИИБ ходимлари ва бир нафар маҳкум томонидан қийноққа солиниши оқибатида тергов ҳибсхонасида вафот этганди. Суд марҳумнинг ўлимига сабабчи деб топган ИИВ ЖИЭДга қарашли 3-сон тергов ҳибсхонасида ишловчи 6 нафар ходимнинг ҳар бирини 1 йил 6 ой муддатга ички ишлар органлари тизимида ишлаш ҳуқуқидан маҳрум қилган ҳолда 4 йил муддатга озодликдан маҳрум қилганди. Шунингдек, қолган 6 нафар ходим эса 1 йил 6 ой муддатга ички ишлар органлари тизими ва шифокорлик лавозимларида ишлаш ҳуқуқидан маҳрум этилиб, 3 йилга озодликни чеклаш жазоси билан жазоланганди. Бундан ташқари, марҳум маҳбусни камерада калтаклаган маҳкум Ж.У.га 4 йил 1 ой муддатга озодликдан маҳрум қилиш жазоси тайинланган.
Изоҳ (0)