Qirg‘iziston va Tojikiston chegarasida chegara hududlari aholisi o‘rtasida yangi konflikt yuzaga keldi. Bu haqda 24.kg xabar berdi.
Qirg‘iziston Milliy xavfsizlik davlat qo‘mitasi chegara xizmatining xabar berishicha, hodisa Tojikistondan Qirg‘iziston hududidan o‘tuvchi Vorux anklaviga olib boradigan yo‘lda sodir bo‘lgan.
“Qirg‘izistonning ikki fuqarosi shaxsiy avtomobilida Oq-Say—Ko‘k-Tosh avtomobil yo‘li bo‘ylab ketayotgan bo‘lgan. Shu payt Tojikiston fuqarolariga tegishli bo‘lgan sakkizta mashinadan iborat karvon Vorux anklavidan Xo‘jay-Alo qishlog‘i tomon yo‘l olgan”, — deyiladi xabarda.
Tojikiston fuqarolari mashinalarida Qirg‘iziston fuqarolarining yo‘lini kesib o‘tmoqchi bo‘lgan. Oqibatda Dacha massivida ikki davlat fuqarolari o‘rtasida janjal kelib chiqqan.
Konflikt avj olishining oldini olish maqsadida voqea joyiga Qirg‘iziston Ichki ishlar vazirligi hududiy bo‘linmasi xodimi yetib kelgan. Biroq u voqea joyiga yaqinlashganda, Tojikiston fuqarolari — Xo‘jay-Alo qishlog‘i aholisi unga hujum qilgani aytilmoqda.
“Qirg‘iziston Ichki ishlar vazirligi xodimi u yerdan chiqib ketishga muvaffaq bo‘lgan, biroq Tojikiston fuqarolari uni kaltaklashga uringan, shuningdek, mashinasining orqa ko‘zgusini ham sindirgan”, — deyiladi xabarda.
Ta’kidlanishicha, hozirda ikki davlat chegarachilari vaziyatni tinchlantirish bo‘yicha muzokaralar olib bormoqda.
Izoh (0)