Ukraina prezidenti Vladimir Zelenskiyning aytishicha, 19-iyulga o‘tar kechasi Rossiyaning Odessa viloyatini o‘qqa tutishi oqibatida yo‘q qilingan 60 ming tonna qishloq xo‘jaligi mahsuloti Xitoyga jo‘natish uchun mo‘ljallangan edi. Bu haqda Ukraina rahbari kechki murojaatida aytdi.
Odessa viloyati harbiy boshqarmasi raketa zarbasi oqibatida Odessa porti hududidagi don va neft terminallari zarar ko‘rganini ma’lum qildi.
“Bu oqshom Rossiya terroridan eng ko‘p jabr ko‘rgan port terminalida Xitoyga jo‘natish uchun mo‘ljallangan 60 ming tonna qishloq xo‘jaligi mahsulotlari saqlanayotgan edi. Dunyoda hamma Rossiyani terror uchun javobgarlikka tortishdan manfaatdor bo‘lishi kerak”, — dedi Zelenskiy.
Uning qo‘shimcha qilishicha, 19-iyulga o‘tar kechasi qilingan hujum Rossiyaning “Odessaga zarar yetkazishga eng katta urinishidir”. Zelenskiyning so‘zlariga ko‘ra, zarba nishoni faqat Ukraina bo‘lmagan, chunki hujumga uchragan portlarda Afrika va Osiyo mamlakatlariga jo‘natish uchun mo‘ljallangan million tonnaga yaqin oziq-ovqat saqlanadi.
18 va 19-iyul kunlari Rossiya qo‘shinlari Ukrainaning janubiy viloyatlariga, jumladan Odessaga raketalar va kamikadze dronlari bilan hujum qildi. Ukraina Qurolli kuchlarining “Janub” operativ qo‘mondonligi Odessa portlaridan birida don va neft terminallari shikastlanganini ma’lum qildi. Ukraina agrar siyosat va oziq-ovqat vaziri Nikolay Solskiyning aytishicha, 19-iyulga o‘tar kechasi g‘alla bitimiga aloqador port obyektlari o‘qqa tutilgan. Oqibatda Chernomorsk portiga yuklanishi kerak bo‘lgan 60 ming tonna don yo‘q qilingan.
Rossiya rasmiylari Odessaning 18-iyul kungi o‘qqa tutilishini Qrim ko‘prigidagi portlash uchun “javob zarbalari” deb atadi.
Izoh (1)
Энди Хитойга Россия бугдой сотадида, кандай булмасин, Россияни Хитойга ёмон отлик килиш турибди бу оркасида. Украина медиаси уша эски усулни ишлатаяпти ))) бечора кучуклар ва мушуклар. Аслида эса, бу Гарбни усули ))