Toshkent shahar hokimining farmoyishi bilan Keles yo‘li ko‘chasi vaqtincha yopildi, deb xabar beradi poytaxt hokimligi matbuot xizmati.
Ma’lum qilinishicha, Olmazor tumani Keles yo‘li ko‘chasini kengaytirish va rekonstruksiya qilish hamda atrofini obodonlashtirish ishlari amalga oshirilmoqda. Shu munosabat bilan, Toshkent shahar hokimining 2023-yil 18-iyuldagi 147-14-0-F/23-sonli farmoyishiga asosan, 19-iyul soat 20:00 dan 30-avgust kuniga qadar Keles yo‘li ko‘chasining Noraztepa ko‘chasi bilan kesishmasidan Uzumbog‘ ko‘chasi bilan kesishmasigacha bo‘lgan oralig‘i barcha turdagi transport vositalari harakati uchun yopildi.
“Haydovchilardan noqulayliklar uchun uzr so‘rab, aylanma yo‘llardan foydalanishlarini tavsiya etamiz”, — deyiladi xabarda.
Bunga qadar velosportning shosse turi bo‘yicha Oqtosh—Chorbog‘ Mountain xalqaro musobaqasi o‘tkazilishi munosabati bilan 10 ,11, 13, 14-may kunlari soat 08:00 dan 17:00 ga qadar Toshkent viloyatining Bo‘stonliq va Yuqori Chirchiq tumanlaridan o‘tgan avtomobil yo‘llari vaqtinchalik yopilgandi. 19-fevral kuni esa “Men g‘olib” ommaviy yugurish musobaqasi o‘tkazilishi munosabati bilan Toshkentning qator ko‘chalarida avtomobillar harakatlanishiga vaqtinchalik cheklov qo‘yilgandi. Toshkentda marafon o‘tkazilishi munosabati bilan 5-mart kuni bir qator ko‘chalar yopilgan edi.
Izoh (0)