Boney M va Doktor Albandan Otawan guruhigacha: Andijonda jahon yulduzlari ishtirokida shou-konsert bo‘lib o‘tdi

Andijon viloyatining Xonobod shahrida ilk marotaba tashkil etilgan “Dunyo sadolari” xalqaro milliy estrada festivalining ochilish marosimi bo‘lib o‘tdi. Tadbir davomida jahon estrada yulduzlari ishtirokida shou-konsert tashkil etildi. Bu haqda “Daryo” muxbiri Umidjon Mamarasulov xabar bermoqda.

Festivalning ochilish marosimida so‘zga chiqqan Madaniyat va turizm vaziri Ozodbek Nazarbekov, Andijon viloyati hokimi Shuhratbek Abdurahmonovlar joriy yilda ilk marotaba o‘tkazilayotgan mazkur xalqaro tadbirda Rossiya, Fransiya, Germaniya, Shvetsiya, Chexiya, Bolgariya, Latviya, Polsha, Gretsiya, Serbiya singari dunyodagi bir qator davlatlarning estrada sanʼati guruhlari, xonandalari ishtirok etib, o‘zlarining milliy sanʼatlarini namoyish etishini bildirdi.

Bayram tadbirida Qoraqalpog‘iston Respublikasi va viloyatlar badiiy jamoalari, estrada xonandalari tomonidan o‘z hududlarini tarannum etuvchi qo‘shiqlar yangradi. Shuningdek, ishtirokchilar Boney M disko-guruhi chiqishlaridan bahramand bo‘ldi.

Tadbir yakunida festival doirasida o‘tkazilgan yosh estrada xonandalari respublika ko‘rik-tanlovi g‘oliblariga Madaniyat va turizm vazirligi hamda Andijon viloyati hokimligi tomonidan pul mablag‘lari hamda esdalik sovg‘alari topshirilgan. Oliy o‘rin egasiga esa shuningdek Turksoy tashkilotining statuetkasi ham topshirilgan.

Festivalning ochilish marosimidan so‘ng Xonobod shahar hokimligi oldida tayyorlangan sahnada jahon estrada yulduzlari Doktor Alban, Boney M disko-guruhi hamda Otawan guruhi ishtirokida shou-konsert o‘tkazildi.

Ushbu tadbirda 10 mingga yaqin ishtirokchi xonandalarning jonli ijrolaridan bahramand bo‘ldi.

Festival doirasida gastronomik ko‘cha tashkil qilingan bo‘lib, viloyatlardan kelgan mohir oshpazlar tomonidan har bir hududning o‘ziga xos taomlari tayyorlanmoqda. Bundan tashqari shaharning Markaziy madaniyat va istirohat bog‘ida ajratilgan maxsus pavilyonlarda Qoraqalpog‘iston Respublikasi hamda viloyatlardan kelgan ijodiy jamoalar va xonandalar o‘z milliy qo‘shiqchilik sanʼatini namoyish etmoqda.

“Dunyo sadolari” xalqaro milliy estrada festivali 20-iyul kuni yakuniga yetadi.