Андижон вилояти ва Тошкент шаҳрида газ, электр ҳамда сув таъминоти ходимларининг фирибгарлик ҳолатлари фош этилди, деб хабар бермоқда Иқтисодий жиноятларга қарши курашиш департаменти ахборот хизмати.
Унга кўра, ҳолатлардан бири Бош прокуратура ҳузуридаги департаментнинг Тошкент шаҳар бошқармаси томонидан ИИББ ходимлари билан ҳамкорликда тадбиркорлик субъектларининг ҳуқуқларини ҳимоя қилиш юзасидан ўтказилган тезкор тадбирда аниқланган. “Мирободтумангаз” газ таъминоти бўлими етакчи муҳандиси Р.М. тадбиркор М.А.нинг Яшнобод туманидаги Авиасозлар кўчасида жойлашган нотурар биносини газлаштириш бўйича лойиҳа ҳужжатларини расмийлаштириб бериши ҳамда газ ҳисоблагич ўрнатиб бериш эвазига тадбиркордан 18 миллион сўмни олган вақтида ашёвий далиллар билан ушланган.
Шу каби, департаментнинг Андижон шаҳар бўлими томонидан ИИБ ходимлари билан ҳамкорликда ўтказилган тезкор тадбирда Андижон туман ЭТК электромонтёри М.И. ва фуқаро О.Н. фуқаро М.И.нинг хонадонидаги электр таъминотидан 7 миллион сўм қарздорлигини йўқ қилиб бериши эвазига 3,5 миллион сўмни олган вақтида ашёвий далиллар билан ушланган.
Худди шундай, департаментнинг Қўрғонтепа туман бўлими томонидан ўтказилган тезкор тадбирда туман “Сувтаъминоти” МЧЖ бўлим назоратчиси М.О. “У.Х.” МЧЖ ошхонасининг сув сарфини ҳисоблаш ускунасининг яроқсизлиги юзасидан расмийлаштирган далолатнома бўйича жарима қўлламаслик ва янги ҳисоблагич ўрнатиб бериш эвазига МЧЖ иш юритувчиси М.А.дан 3 миллион сўмни олган вақтида ашёвий далиллар билан ушланган.
Изоҳ (0)