Terining o‘zgarishi qarishning asosiy belgilaridan biridir. Ma’lum bo‘lishicha, bu onkologiya kabi yaqinlashib kelayotgan kasalliklarning ogohlantiruvchi alomati ham bo‘lishi mumkin.
Britaniyaning Express nashri Reynolds Cancer Support House tashkilotiga tayanib, yuzdagi ba’zi o‘zgarishlar organizmdagi saraton rivojlanishini ko‘rsatishi mumkinligini xabar qildi.
Shifokorlarning fikricha, ulardan biri qizarish va shishdir. Shu bilan birga simptomlar orasida diareya, isitma va nafas qisilishi ham mavjud.
Ma’lum qilinishicha, o‘pka saratoni bilan og‘rigan odamlar aynan shunday holatni boshdan kechirgan: “Izoh quyidagicha: o‘pkaning mayda hujayrali o‘smalari odatda ko‘krak qafasidagi qon tomirlarini to‘sib qo‘yib, bosh terisi va yuzdan qonning erkin va odatdagidek aylanishiga to‘sqinlik qiladi”.
Shuni esda tutish kerakki, saraton — bu hukm emas, chunki har yili dunyoda onkologiyaga qarshi kurashning yangi usullari ishlab chiqilmoqda. Ammo fojiali oqibatlarga olib kelmasligi uchun muntazam ravishda kerakli tekshiruvlardan o‘tishingiz zarur. Bu dastlabki bosqichlarda deyarli barcha turdagi o‘smalarni aniqlash va imkon qadar tezroq davolanishni boshlashning yagona yo‘li.
Saratonning rivojlanishi uning tabiatiga va tashxis qo‘yilgan paytdan boshlab davolash davomiyligiga bog‘liq. Misol uchun erta bosqichda aniqlangan saraton kasalliklarining sezilarli qismi to‘liq davolanishi mumkin.
Yaqin qarindoshlarda kasalliklarning mavjudligi ham muhim rol o‘ynashini unutmang. Agar ilgari oilangiz a’zolaridan kimdadir bu qayd etilgan bo‘lsa, tez-tez tekshiruvdan o‘tish va organizmdagi o‘zgarishlarni diqqat bilan kuzatib borish kerak.
Saratonning ko‘plab belgilarini mustaqil aniqlashingiz mumkin: tanadagi shakllanishlarni, o‘smalarni paypaslab ko‘ring, axlat holatini kuzatib boring, uzoq vaqt davomida o‘tib ketmaydigan og‘riqlarga va vazningizga e’tibor bering. Agar kimdir diyeta kabi hech qanday qo‘shimcha omillarsiz ozib ketsa, bu ham onkologiyani ko‘rsatuvchi yoqimsiz qo‘ng‘iroqqa aylanishi mumkin.
Onkologlar o‘z-o‘zini tekshirishni maslahat berishining sababi shuki, bu sizga ma’lum bir o‘sma haqida gumon qilish imkonini beradi va foydadan holi bo‘lmaydi. 25 yoshdan boshlab ayollar vaqti-vaqti bilan sut bezlarini palpatsiya yo‘li bilan tekshirishlari kerak, shunda o‘sma paydo bo‘lmaganiga ishonch hosil qilishlari mumkin.
Darvoqe, faol turmush tarzini olib borishni boshlash va ularning rivojlanishining asosiy omillari — chekish, spirtli ichimliklar ichish va noto‘g‘ri ovqatlanish kabi odatlarni hayotingizdan chiqarib tashlash orqali ko‘pgina onkologik kasalliklarning oldini olish mumkin.
Izoh (0)