Kimningdir saraton kasalligiga chalinganidan xabar topsak, har safar bu o‘zimizda sodir bo‘lmaydi, deb o‘ylaymiz. Ammo kasal bo‘lganlar ham, ehtimol, xuddi shunday o‘ylashgan. Kasallikning dastlabki belgilarida organizmni tinglash va shifokor bilan maslahatlashish juda muhimdir. Saratonning umumiy va mahalliy belgilari haqida so‘z yuritamiz, deb yozadi “Noviy ochag” nashri.
Saratonning umumiy belgilari
Past gemoglobin
Gemoglobin qondagi oqsil bo‘lib, kislorodni organlarga olib boradi. Gemoglobin darajasining keskin pasayishi onkologiya belgisi bo‘lishi mumkin. Agar biror sabab bilan qon testidan o‘tgan bo‘lsangiz, shifokor o‘sha sabab fonida gemoglobin darajasiga unchalik ahamiyat bermasligi mumkin, shuning uchun o‘zingiz hushyor bo‘ling. Gemoglobin 70-80 birlik ekanligini ko‘rsangiz, onkolog bilan bog‘laning.
Og‘riq
Har bir og‘riqning sababi bor. Masalan, g‘ayrioddiy harakatlar yoki noto‘g‘ri jismoniy zo‘riqish tufayli bel ko‘pincha og‘riydi. Deylik, fitnes-klubga tashrif buyurgan kishi murabbiy yollashdan ko‘ra pul tejashga va mustaqil ravishda mashq qilishga qaror qildi, lekin mashqlar paytida uning holatiga rioya qilmadi. Og‘riq hech qanday sababsiz paydo bo‘lsa, uzoq vaqt davomida o‘tib ketmasa va og‘riq qoldiruvchi tabletkalar bilan yaxshilanmasa, shifokorga borgan yaxshiroqdir.
To‘satdan vazn yo‘qotish
Ushbu alomat ko‘pincha kasallikning keyingi bosqichlarida paydo bo‘ladi, lekin avvalroq paydo bo‘lishi ehtimoldan holi emas. Agar to‘satdan vazn yo‘qotishni boshlagan bo‘lsangiz, ayni paytda stressli vaziyatlarga tushmasangiz, parhezga o‘tmagan bo‘lsangiz va sport bilan shug‘ullanmasangiz, bu onkolog bilan bog‘lanish uchun sababdir. Bemor yaxshi ovqatlanishni to‘xtatadi va suvsizlanish tufayli tezda vazn yo‘qotadi. Chunki o‘simta organizmni boshqacha ishlashga majbur qiladi, bu esa metabolizmni buzadi va keskin vazn yo‘qotishiga olib keladi. To‘satdan kuzatilgan ozg‘inlik quvonish uchun sabab emas, bu alomatdir.
Holsizlik
Dastlabki bosqichlarda bemor kundalik ishdan keyin tezda charchaydi, u ilgari bu ishlarni osonlik bilan yengardi. Buning sababi shundaki, o‘simta organizmni zaharlaydi, odatdagi jarayonlarni o‘zgartiradi. O‘zingizga razm soling, charchoqning boshqa sabablari bormi?
Tez-tez kasal bo‘lasiz
Saraton paydo bo‘lganda, bemorning immuniteti zaiflashadi, endi viruslar va infeksiyalarga qarshi tura olmaydi. Agar tez-tez kasal bo‘lishni boshlasangiz, ayniqsa, issiq mavsumda — bu konditsioner tufayli emas, tekshiruvdan o‘ting. Ushbu alomat saratonning dastlabki bosqichlarida o‘zini namoyon qiladi, ammo uni tanib olish qiyin.
Sariqlik
Toksinlar bilan zaharlanish yoki har qanday jiddiy kasallik bo‘lsa, jigar o‘z funksiyalarini to‘liq bajarishni to‘xtatadi, o‘sma jarayonga aralashadi. Bu esa terining rangi o‘zgarib, sarg‘ish tus olishiga sabab bo‘ladi. Ba’zida kasallik bo‘lsa, teri qorayadi, sochlar tez o‘sishni boshlaydi.
Saratonning mahalliy belgilari
Terining qattiqlashishi
Ko‘krak sohasidagi o‘simtani mustaqil ravishda aniqlash oson, boshqa hollarda faqat shifokor buni sezishi mumkin. Agar terining ostida qattiqlik paydo bo‘lganini sezsangiz, har qanday holatda ham tekshiruvdan o‘ting.
Qon ketishi
Qon ketishi ichki organlarning noto‘g‘ri ishlayotganining belgisidir. Yo‘tal, qusish paytida qon ajralishi mumkin, bunga e’tibor bering. Ko‘karishlar ham onkologiya haqida belgi beradi. Agar tasodifiy ko‘karishdan keyin bir necha hafta ichida o‘tib ketmasa, bu shubhali.
Yo‘tal va ovoz bo‘g‘ilishi
Yo‘talish va ovozning o‘zgarishi nafas olish tizimining saratonini ko‘rsatishi mumkin, ayniqsa, yo‘talganda qon ajralsa. Albatta, bunday alomatlar yallig‘lanish va infeksiyalardan ham kelib chiqadi, ammo har ehtimolga qarshi shifokor ko‘rigidan o‘tgan yaxshiroqdir. Agar yo‘tal va nafas qisilishi ikki haftadan ortiq davom etsa, shifokorga murojaat qiling.
Xollarning kattalashishi
Agar xol hech qanday sababsiz o‘sishni boshlasa, shakli va rangini o‘zgartirsa, bu belgidir, uni zudlik bilan shifokorga ko‘rsatish kerak. Ehtimol, bu xol emas, balki melanoma, ya’ni teri saratoni. Agar teringizda bir necha hafta davomida yo‘qolmaydigan g‘alati izlar yoki notekis xollar bo‘lsa, onkologga murojaat qiling.
Shifokor ko‘rigidan o‘ting
Agar o‘zingizda ushbu alomatlardan birini sezsangiz, albatta, shifokor ko‘rigidan o‘ting. Iloji boricha ertaroq kelajagingiz haqida qayg‘urishni boshlang.
Izoh (0)