Qirg‘iziston poytaxti Bishkekda bo‘lib o‘tgan lider ayollar qurultoyida ombudsman Jamila Jamanbayeva mamlakatda ayollar huquqlarini taʼminlash uchun shoshilinch choralar ko‘rish zarurligini taʼkidladi.
U uyda bolalarni tarbiyalayotgan ayollarga ish staji yozishni taklif qildi. Bu haqda “Daryo” muxbiri xabar berdi.
Jamanbayevaga ko‘ra, “oiladagi zo‘ravonlik darajasi juda yuqori va bunga tuzatish kiritish kerak, ayollarga nisbatan stereotiplarni yo‘q qilish zarur”.
Ombudsman Qirg‘iziston mehnat qonunchiligiga tegishli o‘zgartirishlar kiritishni taklif qildi. U mamlakatda ayollar va bolalarga nisbatan har qanday ko‘rinishdagi zo‘ravonlikning oldini olish bo‘yicha yetarli davlat markazlari va maʼlumotlar yo‘qligini aytdi.
“Militsiya xodimlari davlat organlaridan himoyalanish usullari va turlari haqida aholini keng miqyosda xabardor qilishi kerak”, — deya qo‘shimcha qildi u.
Ombudsman ayollarni himoya qilish uchun quyidagi choralarni ko‘rishni taklif qildi:
- ayollarning mehnat stajiga ular ishdan ketishga majbur bo‘lgan yoki bolalarni tarbiyalash bilan shug‘ullangan vaqtlarini kiritish;
- ayollar va erkaklarning iqtisodiy faoliyatning barcha turlaridan teng foydalanishini ta’minlash;
- ayollarning kichik va o‘rta biznesda bandligini ta’minlash uchun shart-sharoitlar yaratish;
- kichik va o'rta biznesni ochish uchun foizsiz kreditlar berish;
- qishloq va shaharlarda ayollarning bandlik imkoniyatlarini tenglashtirish strategiyasini ishlab chiqish.
Izoh (0)