Yuzlab “vagnerchi”larining Markaziy Afrika Respublikasidan (MAR) ketishi mamlakatdan kompaniya bo‘linmalarini to‘liq olib chiqish degani emas, balki rotatsiyadir. Bu haqda MAR prezidentining matbuot kotibi Albert Yaloke Mokpem ma’lum qildi.
“Biri ketsa, boshqasi keladi”, — dedi MAR rasmiylari vakili matbuot anjumanida va gap yollanma askarlarning “yakuniy chekinishi” haqida ketmayotganini ta’kidladi.
So‘nggi kunlarda bir necha yuzlab “vagnerchi”lar mamlakatni tark etgani haqida Jeune Afrique va Reuters manbalari xabar bergandi. Jeune Afrique ma’lumotlariga ko‘ra, kamida 500-600 nafar yollanma askar Moskvaga qaytgan.
“Vagner” jangchilarining qanchasi MARda qolgani noma’lum, deb ta’kidladi Reuters. Agentlikning yozishicha, yaqin vaqtgacha MARda 1 900 ga yaqin rossiyalik yollanma askarlar, shu jumladan “vagnerchi”lar bor edi.
Rossiya so‘nggi yillarda o‘z ta’sirini faol ravishda oshirayotgan Afrikada “Vagner” guruhining ishlashi masalasi kompaniya asoschisi Yevgeniy Prigojinning isyonidan keyin ko‘tarildi.
Isyondan bir necha kun o‘tib, Rossiya tashqi ishlar vaziri Sergey Lavrov RT telekanaliga bergan intervyusida rossiyalik harbiy instruktorlar mintaqada ishlashda davom etishini aytdi. Vazir gap “vagnerchi”lar haqidami yoki yo‘qligiga aniqlik kiritmadi, biroq MAR va Mali rasmiylari “Vagner”ga rahbariyat xavfsizligini taʼminlash iltimosi bilan rasman murojaat qilganini taʼkidladi.
The Wall Street Journal nashrining yozishicha, Rossiyadagi isyondan so‘ng Kreml Suriya, Markaziy Afrika Respublikasi va Malidagi rasmiylarga “Vagner” ustidan nazoratni o‘z qo‘liga olganini ma’lum qilgan. Reuters manbalarining xabar berishicha, isyon paytida Suriya hukumati va Rossiya harbiylari Prigojinning yollanma bo‘linmalarini Rossiya Mudofaa vazirligi bilan shartnomalar imzolashga majbur qilish uchun bir qator shoshilinch choralar ko‘rgan. Shartnomadan bosh tortgan jangchilar mamlakatdan olib chiqilgan.
Izoh (0)