Iyul oyida Yerni bir nechta magnit bo‘ronlari qoplashi kutilayotgani ma’lum qilingandi. O‘zbekiston Sog‘liqni saqlash vazirligi magnit bo‘ronlarining salbiy ta’siridan himoyalanish bo‘yicha tavsiyalar berdi.
Mutaxassislar maʼlumotiga ko‘ra, 8-iyuldan boshlab Yer sayyorasida 14 kunlik magnit bo‘ronlari kuzatilishi mumkin. Bundan esa ob-havoga sezgir insonlar ehtiyot bo‘lishlari lozim.
Oliy toifali shifokor Raʼno Nosirovaga ko‘ra, yerning magnit maydoni taʼsiri odatda insonlarga sezilmaydi. Biroq baʼzan ushbu maydonda ayrim odamlar his etishi mumkin bo‘lgan tebranishlar kuzatiladi. Buning asosiy sababchisi quyoshdir.
Yaʼni odatda uning faolligi kuzatilganda sayyorani magnit bo‘ronlari qoplaydi. Bu esa surunkali xastaliklarga chalingan insonlar salomatligiga salbiy taʼsir etishi mumkin. Ayniqsa, yurak-qon tomir, asab tizimi kasalliklari, qandli diabet va bronxial astma bilan og‘riyotgan bemorlar bu o‘zgarishlarni ko‘proq his etadi.
Xususan, arterial gipertoniya xastaligi bor odamlarda qon bosimi ko‘tarilib, aksincha gipotenziv bemorlarning qon bosimi pasayadi. Qandli diabet bilan og‘riyotgan kishilarning qonida qand miqdori ortadi. Tananing stresslarga chidamliligi pasayadi. Oqibatda asab tizimi bilan bog‘liq muammosi bor insonlarda gormonlar ishlab chiqarilishi kuchayib, asabiylik, holsizlik, reaksiya susayishi yoki kuchayishi belgilari yuzaga keladi.
Shuningdek, magnit bo‘ronlari payti baʼzi odamlarda yorug‘lik va baland tovushlarga og‘riqli reaksiya, uyqusizlik yoki aksincha uyquchanlik paydo bo‘ladi. Shu sababli magnit bo‘ronining salbiy taʼsirlaridan insonlar o‘zlarini himoyalashi lozim.
“Buning uchun, avvalo, to‘g‘ri ovqatlanish qoidalariga rioya qilish zarur. Yaʼni hazmi og‘ir taomlardan tiyilish, yengil yeguliklar, xususan, qaynatilgan ovqatlar, xo‘l meva va sabzavotlar isteʼmol qilish tavsiya etiladi.
Kunlik taomnomada tuz miqdorini kamaytirish kerak. Chunki u qon bosimini oshiradi. Shu bilan birga, jismoniy mehnatni cheklash, aqliy zo‘riqishlardan tiyilish maqsadga muvofiq. Qolaversa, shu kunlari spirtli va energetik ichimliklardan mutlaqo voz kechgan maʼqul. Tez-tez iliq dush qabul qilish ham magnit bo‘ronining salbiy taʼsirini yengishga yordam beradi”, — deydi mutaxassis.
Qayd etilishicha, surunkali kasalliklarga chalinganlar o‘zlari bilan kerakli dori-darmonlarni olib yurishlari, har bir preparatni shifokor nazoratida qabul qilishlari va qon bosimini tez-tez nazorat qilib turishlari lozim.
Izoh (0)