Тошкент ва Наманган вилоятларида сомонпоя қолдиқлари ёқиб юборилгани аниқланди.
Экология, атроф-муҳитни муҳофаза қилиш ва иқлим ўзгариши вазирлиги Тошкент вилояти бошқармаси матбуот хизматига кўра, 5 июнь куни Пискент тумани “Чимқўрғон” МФЙ ҳудудида жойлашган “Учқун агробизнес” фермер хўжалигига тегишли 9,2 гектар ер майдонининг ғалладан бўшаган қисмида сомонпоя қолдиқлари ёқиб юборилган.
Соҳа вакиллари томонидан ҳолат юзасидан табиатга етказилган зарар ҳисоб-китоб қилинганда 17 миллион 433 минг сўмни ташкил этган. Ҳозирда аниқланган ҳолат бўйича соҳа ходимлари томонидан суд органига тегишли ҳужжатлар расмийлаштирилмоқда.
Шунингдек, Наманган туман экология, атроф-муҳитни муҳофаза қилиш ва иқлим ўзгариши бўлими ходимлари томонидан шу куни ўтказилган рейд давомида туманнинг “Равнақ” МФЙ ҳудудида фуқаро И.О. томонидан такрорий экин экиш мақсадида сомон қолдиқларини ёқиб юборгани аниқланган. Бунинг натижасида икки фермер хўжалигининг 1 гектар ғалладан бўшаган ер майдонидаги сомон қолдиқлари ёниб зарарланган.
Ҳолат юзасидан фуқаро И.О.га нисбатан Маъмурий жавобгарлик тўғрисидаги кодекснинг 88-моддаси 3-қисмига асосан 990 минг сўм жарима ҳамда 4 миллион 669 минг 80 сўм миқдорида тупроққа етказилган зарар ҳисобланган.
Изоҳ (0)