Urushdan qochib, ukrainaliklarning katta qismi Yevropa davlatlarida boshpana topdi. Ular uchun 43 milliard yevrodan ko‘proq mablag‘ ajratilgan. Bu haqda Ukrainaning vaqtinchalik bosib olingan hududlarni reintegratsiya qilish vazirligi xabar berdi.
Mazkur xarajatlar naqd pul to‘lovi, uy-joy, tibbiy yordam, ta’lim xizmati, shuningdek, oziq-ovqat va asosiy ehtiyojni o‘z ichiga oladi.
“Ukrainaliklarni qabul qilgan Yevropa davlatlari orasida Polsha eng ko‘p mablag‘ sarfladi, bu 12 milliard yevrodan oshadi. Germaniya bu ko‘rsatkich bo‘yicha ikkinchi o‘rinda. Uning ukrainalik boshpana izlovchilar uchun sarflagan mablag‘i deyarli 11 milliard yevroga yetdi”, — deyiladi xabarda.
Boshqa davlatlar ajratgan mablag‘ ulushi quyidagicha:
- Chexiya (2,94 mlrd yevro),
- Ispaniya (2,24 mlrd yevro),
- Fransiya (2,04 mlrd yevro),
- Ruminiya (1,26 mlrd yevro),
- Shveysariya (1,16 mlrd yevro)
- Italiya (1,15 mlrd yevro milliard).
Shuningdek, ukrainaliklarga yordam berishga Yevropa davlatlarining oddiy fuqarolari katta hissa qo'shgan.
Yevropadagi ukrainalik qochqinlar
Britaniya razvedkasi ma’lumotlariga ko‘ra, har to‘rtinchi ukrainalik Rossiya harbiylari bostirib kirishi sababli uyini tark etishga majbur bo‘lgan.
Ukraina prezidenti Vladimir Zelenskiy qochqinlarni mamlakatga qaytarish masalasi har bir ukrainalik uchun mustaqil qaror ekanini aytgan. Garchi rasmiylar ogohlantirganidek, urushdan keyingi Ukrainani tiklash rejasi asosan demografik vaziyatga tayanadi.
Izoh (0)