“O‘zsanoatqurilishbank” hududiy tarmoqlari binolarini qayta tiklanuvchi energiya manbalari qurilmalari bilan ta’minlash ishlari qizg‘in davom etmoqda.
Bugungi kunda 34 ta bank tarmog‘i binosiga umumiy quvvati 1285 kVt bo‘lgan quyosh panellari o‘rnatildi.
Joriy yilda mamlakatimizda iqtisodiyot tarmoqlari, aholi va ijtimoiy soha obyektlarida qayta tiklanuvchi energiya manbalarini joriy etish ishlari faol amalga oshirilmoqda.
Bunda Prezidentimizning shu yil 16-fevraldagi “2023-yilda qayta tiklanuvchi energiya manbalarini va energiya tejovchi texnologiyalarni joriy etishni jadallashtirish chora-tadbirlari to‘g‘risida”gi qarori dasturilamal bo‘lmoqda.
Avval xabar berganimizdek, “O‘zsanoatqurilishbank” tomonidan bu boradagi ishlar transformasiya jarayonlari bilan birga bosqichma-bosqich amalga oshirilmoqda.
Bino-inshootlarga quyosh panellari o‘rnatishning afzalligi juda ko‘p, shuning uchun bank tizimini isloh qilishda ushbu yo‘nalish ham rahbariyat diqqat markazida bo‘ldi. Quyosh paneli qurilmasidan foydalanilganda elektr energiyasi tekinga olinadi. Qurilma orqali elektr energiya ishlab chiqarilganda atrof-muhitga hech qanday zararli gazlar chiqmaydi. Asosiysi, quyosh paneli qurilmasi o‘rnatilgan paytdan boshlab daromad olib keladi. Bunday qurilma binolarning tom qismida o‘rnatilgani uchun ishlash jarayonida hech qanday shovqin bo‘lmaydi. Zamonaviy vosita binolarni uzluksiz elektr energiyasi bilan ta’minlash imkonini beradi, – deydi “O‘zsanoatqurilishbank” ATB Ma’muriy xo‘jalik departamenti direktori Farhod To‘rayev.
Bank binolariga quyosh panellarini o‘rnatish muassasa strategiyasidan o‘rin olgan bo‘lib, ishlar xalqaro konsultantlar, ekolog va texnik mutaxassislarni jalb qilgan holda tashkil etildi.
Joriy yilning boshida bank Bosh ofisi hamda Qoraqalpog‘iston Respublikasi, Xorazm, Farg‘ona, Qashqadaryo hududiy boshqarmalarida umumiy quvvati 200 kVt bo‘lgan quyosh panellari o‘rnatilgan edi.
Shu kunga kelib, ushbu hududlar bilan birga Toshkent va Qo‘qon shahridagi hamda Jizzax, Samarqand, Buxoro, Namangan, Andijon, Surxondayo viloyatlardagi tarmoqlar binolarini ham qayta tiklanuvchi energiya manbalari qurilmalari bilan ta’minlash ishlari yakuniga yetkazildi.
Qayd etish joiz, bankning barcha binolariga o‘rnatiladigan quyosh panellarining umumiy quvvati 1455 kVt ni tashkil etadi. Ular yordamida yiliga 2,3 mln kVt soat muqobil elektr energiyasi ishlab chiqarilib natijada atrof-muhitga 1035 tonna zaharli issiqxona gazlari ajralishining oldi olinadi, 1 020,0 mln so‘m iqtisod qilinadi.
Shuningdek, bank ehtiyojidan ortiqcha energiya hududiy elektr tarmoqlariga uzatiladi. Buning uchun jarayon to‘liq avtomatlashtirilgan, onlayn kuzatuv monitoring tizimi yo‘lga qo‘yilgan.
Reklama huquqi asosida.
Izoh (0)