“Ўзсаноатқурилишбанк” ҳудудий тармоқлари биноларини қайта тикланувчи энергия манбалари қурилмалари билан таъминлаш ишлари қизғин давом этмоқда.
Бугунги кунда 34 та банк тармоғи биносига умумий қуввати 1285 кВт бўлган қуёш панеллари ўрнатилди.
Жорий йилда мамлакатимизда иқтисодиёт тармоқлари, аҳоли ва ижтимоий соҳа объектларида қайта тикланувчи энергия манбаларини жорий этиш ишлари фаол амалга оширилмоқда.
Бунда Президентимизнинг шу йил 16 февралдаги “2023 йилда қайта тикланувчи энергия манбаларини ва энергия тежовчи технологияларни жорий этишни жадаллаштириш чора-тадбирлари тўғрисида”ги қарори дастуриламал бўлмоқда.
Аввал хабар берганимиздек, “Ўзсаноатқурилишбанк” томонидан бу борадаги ишлар трансформасия жараёнлари билан бирга босқичма-босқич амалга оширилмоқда.
Бино-иншоотларга қуёш панеллари ўрнатишнинг афзаллиги жуда кўп, шунинг учун банк тизимини ислоҳ қилишда ушбу йўналиш ҳам раҳбарият диққат марказида бўлди. Қуёш панели қурилмасидан фойдаланилганда электр энергияси текинга олинади. Қурилма орқали электр энергия ишлаб чиқарилганда атроф-муҳитга ҳеч қандай зарарли газлар чиқмайди. Асосийси, қуёш панели қурилмаси ўрнатилган пайтдан бошлаб даромад олиб келади. Бундай қурилма биноларнинг том қисмида ўрнатилгани учун ишлаш жараёнида ҳеч қандай шовқин бўлмайди. Замонавий восита биноларни узлуксиз электр энергияси билан таъминлаш имконини беради, – дейди “Ўзсаноатқурилишбанк” АТБ Маъмурий хўжалик департаменти директори Фарҳод Тўраев.
Банк биноларига қуёш панелларини ўрнатиш муассаса стратегиясидан ўрин олган бўлиб, ишлар халқаро консултантлар, эколог ва техник мутахассисларни жалб қилган ҳолда ташкил этилди.
Жорий йилнинг бошида банк Бош офиси ҳамда Қорақалпоғистон Республикаси, Хоразм, Фарғона, Қашқадарё ҳудудий бошқармаларида умумий қуввати 200 кВт бўлган қуёш панеллари ўрнатилган эди.
Шу кунга келиб, ушбу ҳудудлар билан бирга Тошкент ва Қўқон шаҳридаги ҳамда Жиззах, Самарқанд, Бухоро, Наманган, Андижон, Сурхондаё вилоятлардаги тармоқлар биноларини ҳам қайта тикланувчи энергия манбалари қурилмалари билан таъминлаш ишлари якунига етказилди.
Қайд этиш жоиз, банкнинг барча биноларига ўрнатиладиган қуёш панелларининг умумий қуввати 1455 кВт ни ташкил этади. Улар ёрдамида йилига 2,3 млн кВт соат муқобил электр энергияси ишлаб чиқарилиб натижада атроф-муҳитга 1035 тонна заҳарли иссиқхона газлари ажралишининг олди олинади, 1 020,0 млн сўм иқтисод қилинади.
Шунингдек, банк эҳтиёжидан ортиқча энергия ҳудудий электр тармоқларига узатилади. Бунинг учун жараён тўлиқ автоматлаштирилган, онлайн кузатув мониторинг тизими йўлга қўйилган.
Реклама ҳуқуқи асосида.
Изоҳ (0)