Ўзбекистонда рақобат тўғрисидаги қонунчилик ҳужжатларини бузганлик учун маъмурий жавобгарлик чоралари кучайтирилди, деб хабар беради Telegram’даги “Ҳуқуқий ахборот” канали.
Қонун билан Маъмурий жавобгарлик тўғрисидаги кодексга киритилган ўзгартиришга кўра.
Рақобат соҳасидаги ваколатли давлат органига ахборот тақдим этмаслик ёки ўз вақтида тақдим этмаслик ёхуд унга била туриб нотўғри маълумотларни тақдим этганлик:
- фуқароларга БҲМнинг 3 бараваридан 10 бараваригача (990 минг сўмдан 3 миллион 300 минг сўмгача);
- мансабдор шахсларга эса 10 бараваридан 20 бараваригача (3 миллион 300 минг сўмдан 6 миллион 600 минг сўмгача) миқдорда жарима солишга сабаб бўлади.
Илгари: фуқароларга БҲМнинг 3 бараваригача, мансабдор шахсларга эса 5 бараваригача жарима қўлланилган.
Давлат ҳокимияти ва бошқаруви органларининг мансабдор шахси томонидан хом ашё, товарлар эркин ҳаракатланишини ва реализация қилинишини ҳамда хизматлар кўрсатилишини қонунга хилоф равишда чеклаш:
- БҲМнинг 30 бараваридан 50 бараваригача (9 миллион 900 минг сўмдан 16 миллион 500 минг сўмгача) миқдорда жарима солишга сабаб бўлади.
Фаолиятнинг айрим турларини лицензиялашни амалга ошириш, рухсат этиш хусусиятига эга ҳужжатларни бериш ёки махсус электрон тизим воситасида хабарномаларни қабул қилиш ваколатлари ёки рўйхатга олиш ёхуд аккредитациядан ўтказиш ваколатлари берилган давлат унитар корхоналари ёки муассасалари ёхуд юридик шахсларнинг бирлашмалари томонидан рақобатни чеклайдиган қарорлар қабул қилиш:
- БҲМнинг 30 бараваридан 50 бараваригача (9 миллион 900 минг сўмдан 16 миллион 500 минг сўмгача) миқдорда жарима солишга сабаб бўлади. Илгари бундай нормалар мавжуд эмас эди.
Монополияга қарши курашишга қаратилган қонун
Куни кеча “Рақобат тўғрисида”ги қонун янги таҳрирда қабул қилингани тўғрисида хабар берилганди. Қонун билан рақобат соҳасидаги давлат сиёсатининг асосий йўналишлари белгиланган. Қонунга кўра, Рақобатни ривожлантириш ва истеъмолчилар ҳуқуқларини ҳимоя қилиш қўмитаси рақобат соҳасидаги ваколатли давлат органи (монополияга қарши орган) ҳисобланади.
2020 йил 28 май куни Шавкат Мирзиёев томонидан ўтказилган иқтисодиётда рақобат муҳитини таъминлаш ва истеъмолчилар ҳуқуқини ҳимоя қилиш борасидаги вазифалар муҳокамасига бағишланган йиғилишда рақобатни ривожлантириш ва монополияга қарши курашиш борасида мутлақо янги тизим яратиш, давлат иштирокидаги корхоналарда монополияга қарши комплекс тизимини жорий этиш лозимлиги таъкидланганди.
Комплаенс тизимини жорий этиш ишлари илк марта 2019 йилнинг ноябрида Бош прокуратура томонидан “Ўзбекнефтгаз” ва “Ўзкимёсаноат” компанияларида бошланган. Монополияга қарши курашиш қўмитаси ишлаб чиққан ҳукумат қарори лойиҳасида эса 2021 йил 1 январдан бошлаб тажриба (синов) тариқасида давлат иштирокидаги айрим корхоналарда монополияга қарши комплаенс тизимини жорий этиш мажбурий ҳисобланиши белгиланган эди. Кейинроқ 2020 йил 1-октябрга қадар нефть-газ тармоғидаги барча корхоналарда коррупцияга қарши комплаенс-назорат тизими жорий этилиши ҳақида хабар берилган.
Изоҳ (0)