АҚШда ўтказиладиган ҳар президентлик сайловларида сохта овозлар аниқланади. Бу ҳақда “Америка овози” телерадиоси мухбири Навбаҳор Имамова “Дарё” билан суҳбатда айтиб ўтди.
Навбаҳор Имомованинг таъкидлашича, сохта овозлар аниқланади, бироқ улар сайлов натижасига таъсир қиладиган даражада кўп бўлмайди.
“Ўтган 2020 йилги президентлик сайловларида сохта овозлар аниқланган. Кейин текширувлар, суд ишлари бўлди, хулосалар қилинди. Лекин сайлов натижасига таъсир қила оладиган сонда эмас. Албатта, у овозлар ҳисобга олинмайди. Шу пайтгача бу ерда сайлов натижасига таъсир ўтказа оладиган даражадаги хатоликлар кузатилмаган. Қўшма штатларда нафақат сохта овозлар, балки техник хатолар ҳам учрайди”, — деди журналист.
Навбаҳор Имамованинг айтишича, ҳозирда ҳар бир штатда овоз бериш ҳуқуқи бўйича сиёсат борлиги кўп муҳокама қилинади.
“Яъни ўша штатнинг парламенти, Қонунчилар ассамблеяси бу борада қатор қоидаларни белгилаган ва ўзига хос тартиб жорий этилган. Демократлар овози кўпроқ кузатиладиган, либерал руҳдаги штатларда, масалан, республикачилар ҳокимиятга келганида овоз беришни чекловчи, яъни ким овоз бериши мумкин деган савол муҳокамага чиқади. Бу ерда ҳуқуқ ташкилотлари ‘имкон қадар овоз бериш ҳуқуқи чекланишига ҳаракат қилади’, деб нола қилиб келади. Яъни агар республикачилар ҳокимиятга келса, ўша штатда овоз бериш қийинлашади. Чунки республикачилар у ҳудуддаги кўпчилик ҳисобланган демократларнинг овозини бўғишга ҳаракат қилади, деган масала федерал миқёсда муҳокамада. Европада хавфсизлик ва ҳамкорлик ташкилоти бошқа аъзо мамлакатларда бўлганидек, бу ерга ҳам келиб, сайлов жараёнини кузатади ва тизимдаги қатор хатоларни очиб беради”, — деди “Америка овози” мухбири.
Аввалроқ АҚШда 2024 йилнинг ноябрь ойида президентлик сайловлари бўлиб ўтиши, ҳозирданоқ президентликка даъвогарлар “пойгаси” бошлангани ва айни пайтда уларнинг сони ўн нафардан ошгани хабар қилинганди.
Изоҳ (0)